ഐ പി എൽ: പര്‍പ്പിള്‍ ക്യാപ്പ് പോരാട്ടം; ട്രെന്റ് ബോള്‍ട്ട് മൂന്നാം സ്ഥാനത്തെത്തി

ഇന്ത്യൻ പ്രീമിയർ ലീഗിൽ പര്‍പ്പിള്‍ ക്യാപ്പിനുള്ള പോരാട്ടത്തിൽ മൂന്നാം സ്ഥാനത്തേക്ക് കയറി മുംബൈ ഇന്ത്യന്‍സ് പേസര്‍ ട്രെന്റ് ബോള്‍ട്ട്. കഴിഞ്ഞ ദിവസം രാജസ്ഥാന്‍ റോയല്‍സിനെതിരായ മത്സരത്തില്‍ മൂന്ന് വിക്കറ്റ് നേടിയതോടെയാണ് ബോള്‍ട്ട് മൂന്നാമതെത്തിയത്. 11 മത്സരങ്ങളില്‍ 16 വിക്കറ്റാണ് ബോള്‍ട്ട് വീഴ്ത്തിയത്. ഇന്നലെ രാജസ്ഥാനെതിരെ 2.1 ഓവള്‍ എറിഞ്ഞ ബോള്‍ട്ട് 28 റണ്‍സ് വിട്ടുകൊടുത്തിരുന്നു.

ഐപിഎല്ലിൽ ആര്‍സിബി പേസര്‍ ജോഷ് ഹേസല്‍വുഡ് ഒന്നാം സ്ഥാനത്ത് തുടരുന്നു. 10 മത്സരങ്ങള്‍ പൂര്‍ത്തിയാക്കിയ ഹേസല്‍വുഡ് 18 വിക്കറ്റുകള്‍ സ്വന്തമാക്കി. ഒരു തവണ നാല് വിക്കറ്റും നേടി. ഗുജറാത്ത് ടൈറ്റന്‍സിന്റെ പ്രസിദ്ധ് കൃഷ്ണയാണ് രണ്ടാം സ്ഥാനത്ത്. ഒമ്പത് മത്സരങ്ങളില്‍ 17 വിക്കറ്റാണ് പ്രസിദ്ധ് നേടിയത്. ഇന്ന് ഗുജറാത്ത്, സണ്‍റൈസേഴ്‌സ് ഹൈദരാബാദിനെ നേരിടുന്നുണ്ട്. രണ്ട് വിക്കറ്റുകള്‍ കൂടി നേടിയാല്‍ പ്രസിദ്ധിന്, ഹേസല്‍വുഡിനെ മറികടന്ന് ഒന്നാമതെത്താം. ചെന്നൈ സൂപ്പര്‍ കിംഗ്‌സിന്റെ നൂര്‍ അഹമ്മദ് ആണ് നാലാം സ്ഥാനത്ത്.

റണ്‍വേട്ടക്കാര്‍ക്കുള്ള ഓറഞ്ച് ക്യാപ് തിരിച്ചുപിടിച്ച് മുംബൈ ഇന്ത്യന്‍സിന്റെ സൂര്യകുമാര്‍ യാദവ്. ഇന്നലെ നടന്ന മത്സരത്തിൽ രാജസ്ഥാന്‍ റോയല്‍സിനെതിരെ 23 പന്തില്‍ 48 റണ്‍സുമായി സൂര്യകുമാര്‍ യാദവ് പുറത്താകാതെ നിന്നിരുന്നു. 11 മത്സരങ്ങളില്‍ നിന്ന് 475 റണ്‍സുമായാണ് ഗുജറാത്ത് ഓപ്പണര്‍ സായ് സുദര്‍ശനില്‍ നിന്ന് ഓറഞ്ച് ക്യാപ് തിരികെ പിടിച്ചത്. രോഹിത് ശര്‍മ്മയാണ് സൂര്യകുമാറിന് ഓറഞ്ച് ക്യാപ് സമ്മാനിച്ചത്.