ഇന്ത്യന്‍ ഗാനങ്ങള്‍ എഫ്എം റേഡിയോ സ്റ്റേഷനുകള്‍ വഴി കേള്‍പ്പിക്കുന്നത് നിരോധിച്ച് പാക്കിസ്ഥാൻ

ഇസ്ലാമാബാദ്: ഇന്ത്യന്‍ ഗാനങ്ങള്‍ പാക്കിസ്ഥാന്റെ എഫ്എം റേഡിയോ സ്റ്റേഷനുകള്‍ വഴി കേള്‍പ്പിക്കുന്നത് നിരോധിച്ചു. പാക്കിസ്ഥാന്‍ ബ്രോഡ്കാസ്റ്റേഴ്സ് അസോസിയേഷന്റേതാണ് (പിബിഎ) ഉത്തരവ്. സംഘര്‍ഷ കാരണങ്ങളാലാണ് തീരുമാനമെന്നു പാക്കിസ്ഥാന്‍ ബ്രോഡ്കാസ്റ്റേഴ്സ് അസോസിയേഷന്‍ അറിയിച്ചു.

അതേസമയം, പാകിസ്താന്‍ അഭിനേതാക്കളുടെ ഇന്‍സ്റ്റാഗ്രാം അക്കൗണ്ടുകള്‍ ഇന്ത്യയില്‍ നിരോധിച്ചിരുന്നു. മഹിറാ ഖാന്‍, ഹാനിയ ആമിര്‍, സജല്‍ അലി, അലി സഫര്‍, ഇഖ്‌റ അസീസ്, ബിലാല്‍ അബ്ബാസ് ഖാന്‍, സനം സയീദ്, ഇമ്രാന്‍ അബ്ബാസ്, മായ അലി, സാറാ ഖാന്‍, ആയിസ ഖാന്‍ തുടങ്ങിയ പാക്കിസ്ഥാനി അഭിനേതാക്കളുടെ ഇന്‍സ്റ്റാഗ്രാം അക്കൗണ്ടുകളാണ് നിരോധിച്ചത്. പ്രകോപനപരമായ ഉള്ളടക്കങ്ങള്‍ പ്രചരിപ്പിച്ചെന്നാരോപിച്ച് 16 പാകിസ്താനി യൂട്യൂബ് ചാനലുകള്‍ നിരോധിച്ചതിന് പിന്നാലെയാണ് താരങ്ങളുടെ ഇന്‍സ്റ്റാഗ്രാം അക്കൗണ്ടുകളും സര്‍ക്കാര്‍ നിരോധിച്ചത്. ഇതിനു പിന്നാലെയാണ് പാക്കിസ്ഥാന്റെ നടപടി.