ബബിള്‍ ഗം ബിരിയാണിയുമായി കണ്ടന്റ് ക്രിയേറ്റര്‍; വിമർശനവുമായി ബിരിയാണി പ്രേമികൾ

മുംബൈ: മുംബൈയില്‍ നിന്നുള്ള ഒരു കണ്ടന്റ് ക്രിയേറ്ററാണ് ഹീന കൗസര്‍ റാദ്. വ്യത്യസ്ത തരം ബിരിയാണികളുണ്ടാക്കി അതിന്റെ വീഡിയോകള്‍ ഇന്‍സ്റ്റഗ്രാമില്‍ പങ്കുവെയ്ക്കാറുണ്ട് ഹീന. ചായ ബിരിയാണിയും പാനി പൂരി ബിരിയാണിയുമെല്ലാം ഹീന പരീക്ഷിച്ചവയാണ്‌. എന്നാല്‍ ഇത്തവണ ഹീന വേറിട്ടൊരു പരീക്ഷണമാണ് നടത്തിയത്. ഹീനയുടെ ‘ക്രിയേറ്റിവിറ്റി’ അല്‍പം കടന്നുപോയെന്നാണ് ഇതുകണ്ട ഫോളോവേഴ്‌സ് പ്രതികരിച്ചത്.

ബബിള്‍ ഗം കൊണ്ടുണ്ടാക്കിയ ബിരിയാണി ആയിരുന്നു ഹീനയുടെ ആ പരീക്ഷണം. ഫുഡ് വര്‍ക്ക്‌ഷോപ്പിന്റെ ഭാഗമായി ഹീനയും വിദ്യാര്‍ഥികളും ചേര്‍ന്നാണ് ഈ ബിരിയാണി തയ്യാറാക്കിയത്. ‘അങ്ങനെ നമ്മുടെ ബബിള്‍ ഗം ബിരിയാണി തയ്യാറായി, ഇത് ഞാന്‍ എല്ലാവര്‍ക്കും കൊടുക്കാന്‍ പോകുകയാണ്. ആരാണോ ഇത് കഴിക്കാത്തത് അവര്‍ക്ക് ഞാന്‍ സര്‍ട്ടിഫിക്കറ്റ് നല്‍കില്ല, ഗയ്‌സ്!-വീഡിയോയില്‍ തമാശയായി ഹീന പറയുന്നു.

ഇതിന് താഴെ ഒട്ടേറെ പേരാണ് ഹീനയ്‌ക്കെതിരെ രംഗത്തെത്തിയത്. ബിരിയാണിയെ അപമാനിക്കുന്നതിന് തുല്യമാണ് ഇതെന്നും ഭക്ഷണത്തോട് അനാദരവ് കാണിക്കേണ്ടിയിരുന്നില്ലെന്നും ഫോളോവേഴ്‌സ് കമന്റ് ചെയ്തിട്ടുണ്ട്. ഇത്തരം ബിരിയാണികള്‍ ഉണ്ടാക്കുന്നത് നിര്‍ത്തണമെന്നും ബിരിയാണിയോട് ഇത് ചെയ്യേണ്ടിയിരുന്നില്ലെന്നും ഫോളോവേഴ്‌സ് പ്രതികരിച്ചു.