പൊതുപരിപാടിക്കിടെ സുരക്ഷാ വീഴ്ച; എ.എസ്.പിയെ അടിക്കാന്‍ കയ്യോങ്ങി സിദ്ധരാമയ്യ

ബെംഗളൂരു: ബെലഗാവില്‍ നടന്ന പൊതുപരിപാടിക്കിടെ സുരക്ഷാ വീഴ്ച വരുത്തിയ അസിസ്റ്റന്റ് പൊലീസ് സുപ്രണ്ട് (എ.എസ്.പി) നാരായണ്‍ ഭാരമാണിയെ അടിക്കാന്‍ കയ്യോങ്ങി കര്‍ണാടക മുഖ്യമന്ത്രി സിദ്ധരാമയ്യ. സിദ്ധരാമയ്യ പ്രസംഗിക്കാന്‍ തുടങ്ങുന്നതിന് മുമ്പ് വേദിക്ക് താഴെ ബിജെപി പ്രവര്‍ത്തകര്‍ പ്രതിഷേധവുമായി എത്തിയതോടെയായിരുന്നു സംഭവം.

ബിജെപി പ്രവര്‍ത്തകര്‍ വേദിക്ക് തൊട്ടടുത്ത് നിന്ന് മുദ്രാവാക്യം വിളിച്ചതോടെ അദ്ദേഹത്തിന്റെ പ്രസംഗം തടസ്സപ്പെട്ടിരുന്നു. ഇതോടെയാണ് സ്ഥലത്തെ ക്രമസമാധാന ചുമതലയുള്ള എഎസ്പി നാരായണ്‍ ഭരാമണിയെ സിദ്ധരാമയ്യ അടുത്തേക്ക് വിളിച്ചത്. ഇതെന്താണ് സംഭവിക്കുന്നതെന്ന് ചോദിച്ച സിദ്ധരാമയ്യ എഎസ്പിയെ അടിക്കാന്‍ കയ്യോങ്ങുന്നതും കാണാം. എന്നാല്‍ തൊട്ടടുത്തുണ്ടായിരുന്ന കോണ്‍ഗ്രസ് നേതാക്കള്‍ സിദ്ദരാമയ്യയെ തടയുകയായിരുന്നു.