കശ്മീരിലെ ടൂറിസത്തെ പ്രോത്സാഹിപ്പിക്കണം; ബുർഖ ധരിച്ച് വൈകാരിക അഭ്യർത്ഥനയുമായി രാഖി സാവന്ത്

ജമ്മു കശ്മീരിലെ പഹൽഗാമിൽ 26 വിനോദസഞ്ചാരികൾ കൊല്ലപ്പെട്ട ക്രൂരമായ ഭീകരാക്രമണത്തിൽ താൻ അഗാധമായി ദുഃഖിതയാണെന്ന് നടി രാഖി സാവന്ത്. ഈ സംഭവത്തിൽ നടുക്കം രേഖപ്പെടുത്തിയ രാഖി, അതിനെ ശക്തമായി അപലപിച്ചുകൊണ്ട് സോഷ്യൽ മീഡിയയിൽ നിരവധി പോസ്റ്റുകൾ പങ്കുവെച്ചിരുന്നു.

ഏപ്രിൽ 27 ഞായറാഴ്ച, ബുർഖ ധരിച്ചാണ് രാഖി സാവന്ത് വീണ്ടും ഈ വിഷയത്തോട് പ്രതികരിച്ചത്. തൻ്റെ അനുയായികളോട് ഹിന്ദു-മുസ്ലീം വേർതിരിവ് അവസാനിപ്പിക്കാൻ അവർ അഭ്യർത്ഥിച്ചു. കൂടാതെ, കശ്മീരിലെ ടൂറിസത്തെ പ്രോത്സാഹിപ്പിക്കണമെന്ന് സഹ പൗരന്മാരോട് ആവശ്യപ്പെട്ട രാഖി, തൻ്റെ അടുത്ത അവധിക്കാലം കശ്മീരിൽ ചിലവഴിക്കുമെന്ന് ആരാധകർക്ക് വാക്ക് നൽകി.

മതത്തിൻ്റെ പേരിലുള്ള ഭിന്നതകൾ അവസാനിപ്പിക്കാൻ എല്ലാവരോടും ആഹ്വാനം ചെയ്തുകൊണ്ടാണ് രാഖി തൻ്റെ വീഡിയോ സന്ദേശം ആരംഭിച്ചത്. “നമ്മളെല്ലാവരും ഒന്നാണ്. ഹിന്ദുക്കളുടെ ഇന്ത്യ പോലെ തന്നെ മുസൽമാൻമാരുടേതുമാണ് ഇത്. ഹിന്ദു-മുസ്‌ലിം എന്ന് വേർതിരിക്കരുത്. കുട്ടികളാകരുത്, മുതിർന്നവരാകൂ. നമ്മൾ എന്തിനാണ് പരസ്പരം പോരടിക്കുന്നത്’- രാഖി പറഞ്ഞു.