ജീവിതത്തില്‍ ഒരിക്കലും കാണാന്‍ ആഗ്രഹിക്കാത്ത മനുഷ്യൻ: സാജിദ് ഖാനെതിരെ കാസ്റ്റിങ് കൗച്ച് ആരോപണവുമായി നവീന ബോലെ

ഡല്‍ഹി: സംവിധായകനും ടെലിവിഷന്‍ അവതാരകനുമായ സാജിദ് ഖാനെതിരെ കാസ്റ്റിങ് കൗച്ച് ആരോപണവുമായി നടി നവീന ബോലെ. എന്റെ ജീവിതത്തില്‍ ഒരിക്കലും കാണാന്‍ ആഗ്രഹിക്കാത്ത ഒരു മനുഷ്യനാണ് സാജിദ് ഖാന്‍. അയാള്‍ എന്നെ വിളിച്ചപ്പോള്‍ ഞാന്‍ വളരെ ആവേശത്തിലായിരുന്നു. എന്നാല്‍ എന്റെ വസ്ത്രങ്ങള്‍ അഴിച്ചുമാറ്റി അടിവസ്ത്രം മാത്രം ധരിച്ചിരിക്കാന്‍ അയാള്‍ ആവശ്യപ്പെട്ടുവെന്ന് നവീന ബോലെ പറഞ്ഞു.

2007-ല്‍ പുറത്തിറങ്ങിയ ‘ഹേ ബേബി’ എന്ന ബോളിവുഡ് ചിത്രത്തിന്റെ കാസ്റ്റിങ്ങിനിടെയാണ് സാജിദ് ഖാന്‍ മോശമായി പെരുമാറിയതെന്ന് ഒരു യൂട്യൂബ് ചാനലിന് നല്‍കിയ അഭിമുഖത്തില്‍ നവീന ബോലെ പറഞ്ഞു.
ഒരു വര്‍ഷത്തിനുശേഷം മിസിസ് ഇന്ത്യയില്‍ പങ്കെടുക്കുന്നതിനിടയില്‍ സാജിദ് വീണ്ടും തന്നെ ബന്ധപ്പെട്ടുവെന്നും നവീന വെളിപ്പെടുത്തി. ഒരു വേഷത്തിനായി തന്നെ വന്നു കാണുവാന്‍ അയാള്‍ ആവശ്യപ്പെട്ടു. ഒരുപാട് സ്ത്രീകളോട് മോശമായി പെരുമാറുന്നതുകൊണ്ട് തന്നെ ഒരുവര്‍ഷം മുമ്പ് വിളിച്ചത് അയാള്‍ക്ക് ഓര്‍മ്മയുണ്ടാകില്ല എന്നും നടി പറഞ്ഞു.