സൗദിയിലെ വീസ, പാസ്‌പോര്‍ട്ട് സേവനങ്ങള്‍ക്ക് പുതിയ കമ്പനി

സൗദി അറേബ്യയിൽ ഇന്ത്യക്കാർക്കുള്ള വീസ സേവനങ്ങൾ നൽകിയിരുന്ന പുറംകരാറിന് പുതിയ കമ്പനിക്ക്. റിയാദ് ഇന്ത്യന്‍ എംബസിയും ജിദ്ദയിലെ ഇന്ത്യന്‍ കോണ്‍സുലേറ്റുമായി ബന്ധപ്പെട്ട കോണ്‍സുലാര്‍, വീസ, പാസ്‌പോര്‍ട്ട് സേവനങ്ങള്‍ നല്‍കുന്നതിന് പുതിയ കരാർ അലങ്കിത് അസൈന്‍മെന്റ്‌സ് ലിമിറ്റഡിന് ലഭിച്ചു.

ഇതേവരെ വി.എഫ്.എസ് ആയിരുന്നു ഈ സേവനങ്ങൾ നൽകിയിരുന്നത്. പുതിയ ടെൻഡറിൽ ഏറ്റവും കുറവ് തുക ക്വാട്ട് ചെയ്ത അലങ്കിതിന് കരാർ ലഭിക്കുകയായിരുന്നു. വി.എഫ്.എസിന്റെ സേവനം ജൂൺ മുപ്പത് വരെയുണ്ടാകും. ഇതിന് ശേഷമായിരിക്കും അലങ്കിത് എത്തുക. റിയാദിലെ ഇന്ത്യൻ എംബസിയിലാണ് ടെൻഡർ നടപടികൾ നടന്നത്. ബിഎല്‍എസ് ഇന്റര്‍നാഷനല്‍, വൈബിഎ കാനൂ, വിഎഫ് വേള്‍ഡ് ഹോള്‍ഡിങ്‌സ്, അലങ്കിത് അസൈന്‍മെന്റ്‌സ് എന്നീ കമ്പനികളാണ് റിയാദിലെ ടെൻഡറിൽ പങ്കെടുത്തിരുന്നത്.