അതിവേഗ റെയിൽ ഇടനാഴിയിൽ നിർണായക മുന്നേറ്റം; ഗുജറാത്തിൽ കൂറ്റൻ സ്റ്റീൽ പാലം ഒരുങ്ങി

ഇത് രാജ്യത്തിന്റെ ഗതാഗത മേഖലയിൽ വലിയ മാറ്റത്തിന് വഴിയൊരുക്കുന്ന സ്വപ്ന പദ്ധതിയായ അതിവേഗ റെയിൽ ഇടനാഴിയിൽ നിർണായക മുന്നേറ്റം. ഗുജറാത്തിലെ വഡോദരയ്ക്ക് സമീപം ഡെഡിക്കേറ്റഡ് ഫ്രൈറ്റ് കോറിഡോറിന് കുറുകെ 70 മീറ്റർ നീളമുള്ള കൂറ്റൻ സ്റ്റീൽ പാലം സ്ഥാപിച്ചു. മുംബൈയെ അഹമ്മദാബാദുമായി മണിക്കൂറിൽ 320 കിലോമീറ്റർ വേഗതയിൽ ബന്ധിപ്പിക്കുന്ന 508 കിലോമീറ്റർ ദൈർഘ്യമുള്ള അതിവേഗ റെയിൽ പാതയിലെ 28 സമാനമായ പാലങ്ങളുടെ നിർമ്മാണത്തിലെ സുപ്രധാന ചുവടുവയ്പ്പാണിത്. ജപ്പാന്റെ സാങ്കേതിക സഹായത്തോടെ നാഷണൽ ഹൈ സ്പീഡ് റെയിൽ കോർപ്പറേഷൻ ലിമിറ്റഡ് (NHSRCL) ആണ് മുംബൈ-അഹമ്മദാബാദ് ഹൈ-സ്പീഡ് റെയിൽ ഇടനാഴി യാഥാർത്ഥ്യമാക്കുന്നത്.

താഴെയുള്ള ചരക്ക് ഗതാഗതത്തിന് യാതൊരു തടസ്സവുമുണ്ടാക്കാതെ, അതീവ കൃത്യതയോടെയാണ് ഈ പാലം സ്ഥാപിച്ചതെന്ന് NHSRCL അധികൃതർ അറിയിച്ചു. ഉയർന്ന കരുത്തുള്ള സ്റ്റീൽ ഉപയോഗിച്ച് നിർമ്മിച്ച ഈ പാലം, അന്താരാഷ്ട്ര സുരക്ഷാ മാനദണ്ഡങ്ങൾ പാലിച്ചുകൊണ്ട് നൂതന സാങ്കേതിക വിദ്യ ഉപയോഗിച്ചാണ് കൂട്ടിച്ചേർത്തത്. ഓരോ പാലവും അതത് സ്ഥലങ്ങളിലെ പ്രത്യേക സാഹചര്യങ്ങൾക്കനുസരിച്ച് രൂപകൽപ്പന ചെയ്തതാണ്. കൃത്യമായ രൂപകൽപ്പനയും, ലോഡ് വിശകലനവും, നിർമ്മാണ ആസൂത്രണവും ഇതിനായി നടത്തിയിട്ടുണ്ട്. ഈ പുതിയ പാലത്തിൻ്റെ സ്ഥാപനം ആഗോള അതിവേഗ റെയിൽ മാനദണ്ഡങ്ങൾക്കനുസൃതമായി പദ്ധതിയുടെ മുന്നേറ്റത്തിന് കൂടുതൽ കരുത്ത് പകരുന്നു.

സങ്കീർണ്ണവും വലിയതുമായ അടിസ്ഥാന സൗകര്യങ്ങൾ നിർമ്മിക്കുന്നതിൽ ഇന്ത്യയുടെ കഴിവ് ലോകത്തിന് മുന്നിൽ തെളിയിക്കുന്ന ഒരു നേട്ടം കൂടിയാണിത്. ഭൂമി ഏറ്റെടുക്കലിലെയും ലോജിസ്റ്റിക്സിലെയും തടസ്സങ്ങൾ കാരണം പദ്ധതിക്ക് ആദ്യം കാലതാമസമുണ്ടായെങ്കിലും, ഇപ്പോൾ സ്ഥിരമായ പുരോഗതി കൈവരിക്കുകയാണ്. ഇനിയും 20 ലധികം സ്റ്റീൽ പാലങ്ങൾ ഈ പാതയിൽ നിർമ്മിക്കാൻ പദ്ധതിയുണ്ട്. ഒന്നിലധികം പാലങ്ങളുടെ വിജയകരമായ നിർമ്മാണം സാങ്കേതികപരമായ നേട്ടം മാത്രമല്ല, അതിവേഗ റെയിലിൽ പൊതുജനങ്ങൾക്കുള്ള വിശ്വാസം വർദ്ധിപ്പിക്കുന്നതിനും നിർണായകമാണെന്ന് വിദഗ്ദ്ധർ അഭിപ്രായപ്പെടുന്നു. സുസ്ഥിരവും വേഗതയേറിയതും കുറഞ്ഞ മലിനീകരണമുള്ളതുമായ നഗരാന്തര ഗതാഗത സംവിധാനങ്ങൾ വികസിപ്പിക്കുക എന്ന ഇന്ത്യയുടെ ലക്ഷ്യത്തിലേക്കുള്ള സുപ്രധാന ചുവടുവയ്പ്പാണിത്.

ഈ അതിവേഗ റെയിൽ പാത യാഥാർത്ഥ്യമാകുന്നതോടെ, പ്രാദേശിക വിമാനപാതകളിലെ തിരക്ക് കുറയ്ക്കാനും, നഗരാന്തര യാത്രകളിലെ കാർബൺ പുറന്തള്ളൽ ഗണ്യമായി കുറയ്ക്കാനും സാധിക്കും. നിലവിൽ റോഡ് മാർഗ്ഗമോ, സാധാരണ ട്രെയിൻ മാർഗ്ഗമോ ആറ് മുതൽ എട്ട് മണിക്കൂർ വരെ യാത്രാ സമയമെടുക്കുന്ന മുംബൈ-അഹമ്മദാബാദ് യാത്ര, ഈ അതിവേഗ റെയിൽ വരുന്നതോടെ വെറും രണ്ട് മണിക്കൂറായി ചുരുങ്ങും.