സണ്‍റൈസേഴ്‌സ് ഹൈദരാബാദിനെ നാലു വിക്കറ്റിന് തകര്‍ത്ത് മുംബൈ ഇന്ത്യന്‍സ്

മുംബൈ: ഐപിഎല്ലില്‍ സണ്‍റൈസേഴ്‌സ് ഹൈദരാബാദിനെ നാലു വിക്കറ്റിന് തകര്‍ത്ത് മുംബൈ ഇന്ത്യന്‍സ്. ആദ്യം ബാറ്റ് ചെയ്ത് ഹൈദരാബാദ് ഉയര്‍ത്തിയ 162 റണ്‍സ് വിജയലക്ഷ്യം മുംബൈ ആറ് വിക്കറ്റ് നഷ്ടത്തില്‍ മറികടന്നു. 26 പന്തില്‍ 36 റണ്‍സെടുത്ത വില്‍ ജാക്‌സാണ് മുംബൈയുടെ ടോപ് സ്‌കോറര്‍. സൂര്യകുമാര്‍ യാദവും രോഹിത് ശര്‍മയും 26 റണ്‍സ് വീതവും ക്യാപ്റ്റന്‍ ഹാര്‍ദിക് 21 റണ്‍സും നേടി.

നേരത്തെ ടോസ് നഷ്ടമായി ബാറ്റിങ്ങിനിറങ്ങിയ ഹൈദരാബാദ് 162 ണ്‍സ് മാത്രമാണ് നേടിയത്. കഴിഞ്ഞ മത്സരത്തില്‍ സെഞ്ച്വറി നേടിയ അഭിഷേക് ശര്‍മ 28 പന്തില്‍ 40 റണ്‍സ് നേടി. ഹെന്‍ഡ്രിച് ക്ലാസന്‍ 28 പന്തില്‍ 37 റണ്‍സ് നേടി. ട്രാവിസ് ഹെഡ് 28 റണ്‍സ് നേടി.