യുഎഇയിൽ അശ്രദ്ധമായി വാഹനമോടിക്കുന്നവർക്കെതിരെ നടപടി കടുപ്പിച്ച് ആഭ്യന്തര മന്ത്രാലയം

യുഎഇയിൽ അശ്രദ്ധമായി വാഹനമോടിക്കുന്നവർക്കെതിരെ നടപടി കടുപ്പിച്ച് ആഭ്യന്തര മന്ത്രാലയം. കുറ്റക്കാർക്ക് ഒരു വർഷം തടവും ഒരു ലക്ഷം ദിർഹം (23.49 ലക്ഷം രൂപ) വരെ പിഴയുമാണ് പരിഷ്കരിച്ച ഗതാഗത നിയമത്തിലുള്ളത്. അപകടകരമായ രീതിയിൽ വാഹനമോടിക്കുന്ന ഡ്രൈവർമാരെ അറസ്റ്റ് ചെയ്യുന്നത് അടക്കം കൂടുതൽ അധികാരം ട്രാഫിക് എൻഫോഴ്സ്മെന്റ് ഉദ്യോഗസ്ഥർക്ക് നൽകി.

റോഡപകടവും പരുക്കും മരണവും കുറയ്ക്കുന്നതിന്റെ ഭാഗമായാണിത്.ആഭ്യന്തര മന്ത്രാലയത്തിന്റെ കണക്ക് അനുസരിച്ച് 2024ൽ യുഎഇയിൽ ജനങ്ങളുടെ ജീവനും സ്വത്തിനും അപകടമുണ്ടാക്കും വിധം അശ്രദ്ധയോടെ വാഹനമോടിച്ച 4,291 കേസുകൾ റിപ്പോർട്ട് ചെയ്തിരുന്നു. ഇതിൽ 2,765 ലംഘനങ്ങളും ദുബായിലാണ് ഉണ്ടായത്. അബുദാബി, ഷാർജ തുടങ്ങി മറ്റ് എമിറേറ്റുകളിൽ നിയമലംഘനങ്ങൾ കുറഞ്ഞതായും റിപ്പോർട്ടിലുണ്ട്.