ലോകത്തെ അതിസമ്പന്ന നഗരങ്ങളുടെ പട്ടികയിൽ ഇടംപിടിച്ച് ദുബായ്

ലോകത്തെ 20 അതിസമ്പന്ന നഗരങ്ങളുടെ പട്ടികയിൽ ദുബായ് ഇടംപിടിച്ചു. 20 ശതകോടീശ്വരന്മാർ ഉൾപ്പെടെയുള്ള 81,200 കോടീശ്വരന്മാരുടെ സാന്നിധ്യമാണ് പട്ടികയിൽ ഇടംനേടാൻ ദുബായിക്കു കരുത്തായത്. ന്യൂ വേൾഡ് വെൽത്തുമായി സഹകരിച്ച് ഹെൻലി ആൻഡ് പാർട്നേഴ്സ് പുറത്തിറക്കിയ ലോകത്തിലെ ഏറ്റവും സമ്പന്ന നഗരങ്ങളുടെ പട്ടികയിൽ 18-ാം സ്ഥാനത്താണ് ദുബായ്. മുൻപുണ്ടായിരുന്ന 21–ാം സ്ഥാനത്തുനിന്നാണ് ദുബായിയുടെ കുതിപ്പ്.

സമ്പത്തിന്റെയും സമൃദ്ധിയുടെയും ഇടമെന്ന പദവി ഉറപ്പിക്കുന്ന ദുബായ്, അറബ് നഗരങ്ങളിൽ ഒന്നാമതുമാണ്.10 വർഷത്തിനിടെ, കോടീശ്വരന്മാരുടെ എണ്ണത്തിൽ 102% വർധന നേടിയ ദുബായ് ഈയിനത്തിൽ അതിവേഗം വളരുന്ന ലോകത്തിലെ മൂന്നാമത്തെ നഗരമായും മാറി. കഴിഞ്ഞവർഷം മാത്രം 8,700 കോടീശ്വരന്മാരെയാണ് നഗരം ആകർഷിച്ചത്. ദുബായിൽ 10 കോടി ഡോളറിൽ കൂടുതൽ ആസ്തിയുള്ളവരുടെ എണ്ണം 237 ആയും ഉയർന്നു. 2023ൽ അത് 212 ആയിരുന്നു.