സ്റ്റീഫൻ ഫ്ലെമിംഗിന് അതൃപ്തി: ഐ. പി. എൽ സീസൺ കഴിയുന്നത് വരെ യുട്യൂബ് വിശകലനമില്ലെന്ന് അശ്വിൻ

ഇന്ത്യൻ പ്രീമിയർ ലീഗിന്റെ ഈ സീസൺ കഴിയുന്നത് വരെ തന്‍റെ യുട്യൂബ് ചാനലില്‍ ചെന്നൈ സൂപ്പര്‍ കിങ്‌സുമായി ബന്ധപ്പെട്ട വീഡിയോകളൊന്നും പോസ്റ്റ് ചെയ്യില്ലെന്ന് ആര്‍ അശ്വിന്‍ പറഞ്ഞു. താരത്തിന്റെ യുട്യൂബ് ചാനലിലൂടെയുള്ള പ്രതികരണത്തിൽ ചെന്നൈ പരിശീലകനായ സ്റ്റീഫൻ ഫ്ലെമിംഗ് അതൃപ്തി അറിയച്ചതിനെത്തുടര്‍ന്നാണ് തീരുമാനമെന്നാണ് റിപ്പോർട്ട്.

അതേസമയം നേരത്തെ യുട്യൂബ് ചാനലിൽ ടീമിൽ അശ്വിനും ജഡേജയുമുള്ളപ്പോള്‍ അഫ്ഗാന്‍ സ്പിന്നര്‍ നൂർ അഹമ്മദിന് അമിത പ്രാധാന്യം നല്‍കുന്നതിനെ വിമര്‍ശിക്കുന്ന വീഡിയോ അശ്വിന്‍ പങ്കുവെച്ചിരുന്നു. വീഡിയോ വിവാദമായതോടെ അശ്വിന്‍ അത് പിന്‍വലിച്ചു. ശേഷം ഇപ്പോൾ ചെന്നൈയുടെ മത്സരങ്ങളുമായി ബന്ധപ്പെട്ട വീഡിയോകളൊന്നും കവര്‍ ചെയ്യില്ലെന്നും സോഷ്യൽ മീഡിയയിൽ കുറിച്ചു.

രാജ്യാന്തര ക്രിക്കറ്റില്‍ നിന്ന് വിരമിച്ച അശ്വിന്‍ ഈ സീസണോടെ ഐപിഎല്ലില്‍ നിന്നും വിരമിക്കുമെന്നാണ് കരുതുന്നത്. രാജസ്ഥാന്‍ റോയല്‍സ് താരമായിരുന്ന അശ്വിനെ 9.75 കോടി മുടക്കിയാണ് ചെന്നൈ തിരിച്ചെത്തിച്ചത്. എന്നാല്‍ സീസണില്‍ ചെന്നൈക്കായി തിളങ്ങാന്‍ ഇതുവരെ അശ്വിനായിട്ടില്ല. 16.66 ലക്ഷം സബ്സ്ക്രൈബര്‍മാരുള്ള അശ്വിന്‍റെ യുട്യൂബ് ചാനലിൽ ക്രിക്കറ്റിലെ പല കാര്യങ്ങളെ കുറിച്ച് വിമർശിച്ചും പിന്തുണച്ചും രംഗത്തെത്താറുണ്ട്.