ഗുജറാത്ത് ടൈറ്റന്‍സ് നായകന്‍ ശുഭ്മാന്‍ ഗിൽ ഐപിഎല്ലില്‍ അപൂര്‍വ റെക്കോര്‍ഡ് സ്വന്തമാക്കി. കഴിഞ്ഞ ദിവസം നടന്ന മത്സരത്തിൽ സണ്‍റൈസേഴ്സ് ഹൈദരാബാദിനെതിരെ സീസണിലെ ആദ്യ അര്‍ധസെഞ്ചുറിയുമായി ഗില്‍ ടീമിന്‍റെ വിജയശില്‍പിയായിരുന്നു. പുറത്താകാതെ നേടിയ 61 റണ്‍സോടെ ഗില്‍ ഐപിഎല്ലില്‍ 25-ാം വയസില്‍ സാക്ഷാല്‍ വിരാട് കോലിക്കും രോഹിത്തിനും സ്വന്തമാക്കാന്‍ കഴിയാത്തൊരു അപൂര്‍വനേട്ടവും സ്വന്തമാക്കി.
ഹൈദരബാദിനെതിരെ നേടിയ അര്‍ധസെഞ്ചുറി ഗില്ലിന്‍റെ ഐപിഎല്‍ കരിയറിലെ 25-ാം അര്‍ധസെഞ്ചുറിയാണ്. ഐപിഎല്ലില്‍ 25-ാം വയസില്‍ ഏറ്റവും കൂടുതല്‍ അര്‍ധസെഞ്ചുറി സ്വന്തമാക്കുന്ന താരമെന്ന റെക്കോര്‍ഡാണ് ഗിൽ സ്വന്തമാക്കിയത്. ഐപിഎല്ലില്‍ നാലു സെഞ്ചുറികളും 25 അര്‍ധസെഞ്ചുറികളുമുള്ള ഗില്‍ പത്തൊമ്പതാം വയസില്‍ 2018ല്‍ കൊല്‍ക്കത്ത നൈറ്റ് റൈഡേഴ്സ് താരമായാണ് ഐപിഎല്‍ കരിയര്‍ തുടങ്ങിയത്.
അതേസമയം 2021വരെ കൊല്‍ക്കത്തയില്‍ കളിച്ച ഗില്‍ ടീമിനായി 10 അര്‍ധസെഞ്ചുറികള്‍ നേടിയിരുന്നു. 2022ല്‍ ഗുജറാത്ത് ടൈറ്റന്‍സിലെത്തിയ ഗില്‍ 15 അര്‍ധസെഞ്ചുറികള്‍ നേടി. ഹാര്‍ദ്ദിക് പാണ്ഡ്യ ഗുജറാത്ത് വിട്ട് മുംബൈയിലേക്ക് മാറിയതോടെ കഴിഞ്ഞ സീസണിലാണ് ഗില്‍ ഗുജറാത്ത് നായകനായത്.
ഗില്‍ കഴിഞ്ഞാല്‍ 25-ാം വയസില്‍ ഐപിഎല്ലില്‍ ഏറ്റവും കൂടുതല്‍ അര്‍ധസെഞ്ചുറികള്‍ നേടിയ താരം രോഹിത് ശര്‍മയാണ്. 25-ാം വയസില്‍ 19 അര്‍ധസെഞ്ചുറികളും ഒരു സെഞ്ചുറിയുമാണ് രോഹിത് നേടിയത്. 16 വീതം അര്‍ധസെഞ്ചുറികള്‍ നേടിയ ഇഷാന്‍ കിഷനും ശ്രേയസ് അയ്യരും വിരാട് കോലിയും റിഷഭ് പന്തുമാണ് ഗില്ലിനും രോഹിത്തിനും പിന്നിലുള്ളത്.
