അടവുകൾ വീണ്ടും ഏറ്റില്ല: ചെപ്പോക്കില്‍ അടിപതറി ചെന്നൈ; തുടര്‍ച്ചയായ മൂന്നാം ജയവുമായി ഡല്‍ഹി ക്യാപിറ്റല്‍സ്

ചെന്നൈ: ചെപ്പോക്കില്‍ വീണ്ടും അടിപതറി ചെന്നൈ സൂപ്പര്‍ കിങ്‌സ്. ചെന്നൈയ്‌ക്കെതിരെ ഡല്‍ഹി ക്യാപിറ്റല്‍സിന് 25 റണ്‍സിന്റെ ജയം. ഡല്‍ഹിയുടെ 183 റണ്‍സ് ടോട്ടല്‍ പിന്തുടര്‍ന്ന ചെന്നൈ 163 റണ്‍സാണ് എടുത്തത്. ചെന്നൈയ്ക്ക് വേണ്ടി വിജയ് ശങ്കര്‍ അര്‍ധ സെഞ്ച്വറി നേടി. 54 പന്തില്‍ 69 റണ്‍സാണ് താരം നേടിയത്. ധോണി 26 പന്തില്‍ 30 റണ്‍സ് നേടി.

നേരത്തെ ടോസ് നേടി ബാറ്റിങ് തിരഞ്ഞടുത്ത ഡല്‍ഹി ആറ് വിക്കറ്റ് നഷ്ടത്തില്‍ 183 റണ്‍സ് നേടി. 51 പന്തില്‍ നിന്നും ആറ് ഫോറുകളും മൂന്ന് സിക്‌സറുമടിച്ച് 77 റണ്‍സ് നേടിയ കെ.എല്‍ രാഹുലാണ് ഡല്‍ഹിയുടെ ടോപ് സ്‌കോറര്‍. ഇതോടെ നാല് മത്സരങ്ങളില്‍ മൂന്ന് തോല്‍വിയും ഒരു ജയവും മാത്രമായി ചെന്നൈ പോയിന്റ് ടേബിളില്‍ താഴേക്ക് പോയി. തുടര്‍ച്ചയായ മൂന്നാം മത്സരത്തിലും ജയിച്ച് ഡല്‍ഹി ക്യാപിറ്റല്‍സ് ഒന്നാം സ്ഥാനത്തേക്ക് കയറി.