ഋതുരാജ് ഗെയ്ക്വാദിന് പരിക്ക്; ചെന്നൈയെ നയിക്കാൻ വീണ്ടും ക്യാപ്റ്റന്‍ കൂള്‍ എത്തും 

ചെന്നൈ: ചെന്നൈ സൂപ്പര്‍ കിങ്സ് ക്യാപ്റ്റന്‍ ഋതുരാജ് ഗെയ്ക്വാദിന് പരിക്ക്. ഈ സാഹചര്യത്തില്‍ ചെന്നൈയെ വീണ്ടും എം.എസ് ധോണി നയിക്കാന്‍ സാധ്യത. ശനിയാഴ്ച ചെന്നൈയില്‍ ഡല്‍ഹി ക്യാപ്പിറ്റല്‍സിനെതിരായ മത്സരത്തിലാകും ക്യാപ്റ്റന്‍ കൂള്‍ തിരികെയെത്തുക.

രാജസ്ഥാന്‍ റോയല്‍സിനെതിരായ അവസാന മത്സരത്തിനിടെ തുഷാര്‍ ദേശ്പാണ്ഡെയുടെ പന്ത് തട്ടിയാണ് ഋതുരാജിന്റെ വലതു കൈത്തണ്ടയില്‍ പരിക്കേറ്റത്. ഇതോടെ അടുത്ത മത്സരത്തില്‍ താരത്തിന് കളിക്കാന്‍ സാധിക്കുമോ എന്നതില്‍ വ്യക്തതയില്ല. പരിക്കേറ്റ ശേഷം ഋതുരാജ് പരിശീലനം നടത്തിയിട്ടില്ല. നെറ്റ്സിലെ പരിശീലനത്തിലെ ഋതുരാജിന്റെ പ്രകടനം നോക്കിയേ താരം കളിക്കുന്ന കാര്യത്തില്‍ തീരുമാനമെടുക്കൂ എന്നാണ് സൂപ്പര്‍ കിങ്സിന്റെ ബാറ്റിങ് പരിശീലകന്‍ മൈക്ക് ഹസ്സി പ്രതികരിച്ചത്. ഋതുരാജ് കളിച്ചില്ലെങ്കില്‍ പിന്നെ ചെന്നൈക്ക് മറ്റ് ക്യാപ്റ്റന്‍സി ഓപ്ഷനുകളൊന്നും തന്നെയില്ല. ഇതോടെ താരം കളിക്കാന്‍ ഫിറ്റ് അല്ലെങ്കില്‍ ധോണിതന്നെ മത്സരത്തില്‍ ചെന്നൈയുടെ ക്യാപ്റ്റന്‍ സ്ഥാനത്തേക്ക് വന്നേക്കും.