അര്‍ജന്റീനിയന്‍ ഫുട്‌ബോള്‍ ടീം ഈ വര്‍ഷം അവസാനം കേരളത്തില്‍ പ്രദര്‍ശന മത്സരങ്ങള്‍ കളിക്കുമെന്ന പ്രഖ്യാപനം വന്നിരുന്നു. എന്നാല്‍ മെസിയും കൂട്ടരും രണ്ട് പ്രദര്‍ശനമത്സരങ്ങള്‍ കളിക്കുമ്പോള്‍ അതിനായി കേരളം ചിലവിടേണ്ട തുക നൂറ് കോടിയാണ്. ദൈനിക് ഭാസ്‌കര്‍ റിപ്പോര്‍ട്ടനുസരിച്ച് സന്ദര്‍ശക ടീമിനായി ഒരു സെവന്‍ സ്റ്റാര്‍ ഹോട്ടല്‍ മുഴുവനായും ബുക്ക് ചെയ്യണം. പുറത്തുനിന്നുള്ള ഒരാളെയും ഹോട്ടലിലേക്ക് പ്രവേശിപ്പിക്കില്ലെന്നുമാണ് റിപ്പോർട്ടുകൾ.
അതേസമയം ഇന്ത്യയില്‍ അര്‍ജന്റീനയുമായി പ്രദര്‍ശന മത്സരം കളിക്കേണ്ട ടീം ഏതെന്ന കാര്യത്തില്‍ ഇതുവരെ തീരുമാനമായിട്ടില്ല. അർജന്റീനയുടെ എതിരാളികളായി എത്തുന്ന ടീമിന് അമ്പത് കോടിയായിരിക്കും ലഭിക്കുക. 2011-ല്‍ കൊല്‍ക്കത്തയില്‍ വെനസ്വേലക്കെതിരെ ലോകകപ്പ് യോഗ്യത മത്സരം കളിച്ചപ്പോഴാണ് മെസി അവസാനമായി ഇന്ത്യ സന്ദര്‍ശിച്ചത്.
കേരളത്തിന്റെ കായിക മന്ത്രി വി അബ്ദുറഹ്‌മാന്‍ ആണ് മെസിയും സംഘവും കേരളത്തില്‍ കളിക്കാനെത്തുമെന്ന കാര്യം പ്രഖ്യാപിച്ചത്. എന്നാല്‍ അര്‍ജന്റീന കളിക്കുമെന്ന ഉറപ്പുകിട്ടാൻ നീണ്ട കാത്തിരിപ്പായിരുന്നു. കഴിഞ്ഞ മാസമാണ് അര്‍ജന്റീന കളിക്കാനെത്തുമെന്ന ഉറപ്പ് സര്‍ക്കാരിന് ലഭിച്ചത്. ടീമിനായി ചെലവാകുന്ന തുകക്ക് സ്‌പോണ്‍സര്‍മാരെ കണ്ടെത്തിയാണ് ലോക ചാമ്പ്യന്‍മാരെ കേരളത്തിലേക്ക് എത്തുന്നത്.
