ഇന്ത്യയിൽ ഇലക്ട്രിക്ക് കാർ വില കുത്തനെ കുറയും

ഇന്ത്യൻ ഇലക്ട്രിക് വാഹന വിപണിയിൽ വളർച്ചയ്ക്ക് സാക്ഷ്യം വഹിക്കുകയാണ്. ലോകത്തിലെ മുൻനിര ഇലക്ട്രിക് വാഹന നിർമ്മാതാക്കൾ രാജ്യത്ത് പ്രവേശിച്ചുകൊണ്ടിരിക്കുന്നു. അതുകൊണ്ടുതന്നെ അതിവേഗം വികസിച്ചുകൊണ്ടിരിക്കുകയാണ് നമ്മുടെ ഇവി വിപണി. അമേരിക്കൻ വാഹന ഭീമനായ ടെസ്‌ലയും ഇന്ത്യയിലേക്ക് വരികയാണ്. അതേസമയം ചൈനീസ് വാഹന ബ്രാൻഡായ ബിവൈഡി (ബിൽറ്റ് യുവർ ഡ്രീം) ഇതിനകം തന്നെ രാജ്യത്തെ പ്രീമിയം ഉൽപ്പന്ന ശ്രേണിയിൽ സ്ഥാനം പിടിച്ചിട്ടുണ്ട്. ആഗോള ഇലക്ട്രിക് വാഹന വിപണിയിലെ കടുത്ത എതിരാളികളാണ് ബിവൈഡിയും ടെസ്‌ലയും. വിൽപ്പന അനുസരിച്ച് ലോകത്തിലെ ഏറ്റവും വലിയ ഇലക്ട്രിക് വാഹന കമ്പനിയായി ബിവൈഡി അടുത്തിടെ ടെസ്‌ലയെ മറികടന്നിരിക്കുന്നു.

ഇന്ത്യയിലെ വിപണി ശക്തിപ്പെടുത്തുക എന്ന ലക്ഷ്യത്തോടെ, തെലങ്കാനയിലെ ഹൈദരാബാദിൽ ഒരു ഉൽപ്പാദന കേന്ദ്രം സ്ഥാപിക്കാൻ ബിവൈഡി പദ്ധതിയിടുന്നു എന്നാണ് പുതിയ റിപ്പോർട്ടുകൾ. ദി ഫിലോക്‌സിന്റെ റിപ്പോർട്ട് അനുസരിച്ച്, ചൈനീസ് വാഹന നിർമ്മാതാക്കൾ ഒരു പുതിയ ഇവി നിർമ്മാണ പ്ലാന്റിൽ 85,000 കോടി രൂപ (10 ബില്യൺ ഡോളർ) നിക്ഷേപിക്കാൻ ആലോചിക്കുന്നു. ഈ പദ്ധതിക്കായി കമ്പനി നിലവിൽ തെലങ്കാനയിൽ 500 ഏക്കറിൽ അധികം ഭൂമി വാങ്ങുന്ന കാര്യം വിലയിരുത്തുകയാണ്.