വലിയൊരു തോൽവി ഉണ്ടായില്ലെന്നതിൽ സന്തോഷം : പരാജയത്തെക്കുറിച്ച് റുതുരാജ്

ഇന്ത്യൻ പ്രീമിയർ ലീഗിൽ റോയൽ ചലഞ്ചേഴ്സ് ബെം​ഗളൂരുവിനെതിരായ പരാജയത്തിൽ പ്രതികരണവുമായി ചെന്നൈ സൂപ്പർ കിങ്സ് നായകൻ റുതുരാജ് ഗെയ്ക്ക്‌വാദ്. ടീമിനുണ്ടായത് വലിയ തോൽവിയല്ലെന്നും 50 റൺസിന്റെ വ്യത്യാസം മാത്രമാണുള്ളതെന്നും റുതുരാജ് ഗെയ്ക്ക്‌വാദ് പറഞ്ഞു.

‘ചെപ്പോക്കിൽ 170ന് മുകളിൽ റൺസ് നേടിയാൽ ജയിക്കുക ബുദ്ധിമുട്ടാണ്. അതിന് കഠിനമായ അധ്വാനം വേണം. നേരത്തെ ഫീൽഡിങ്ങിലെ മോശം പ്രകടനം തോൽവിക്ക് കാരണമായി. പിന്നാലെ ചെന്നൈ നന്നായി ബാറ്റ് ചെയ്തതുമില്ല. ആദ്യ അഞ്ച് ഓവറിൽ ഔട്ട്ഫീൽഡ‍ിന് വേ​ഗത കുറവായിരുന്നു. എന്തായാലും വലിയൊരു തോൽവി ഉണ്ടായില്ലെന്നതിൽ സന്തോഷമുണ്ട്. 50 റൺസിന് മാത്രമാണ് ചെന്നൈ പരാജയപ്പെട്ടത്. ചെന്നൈ നഷ്ടമാക്കിയ ക്യാച്ചുകൾക്ക് ശേഷം നിരവധി ബൗണ്ടറികളും സിക്സറുകളുമാണ് പിറന്നത്. അടുത്ത മത്സരം ​ഗുവാഹത്തിയിലാണ്. സി എസ് കെ അതിനായി മാനസികമായി തയ്യാറെടുക്കുകയാണ്. ബാറ്റിങ്ങിലും ബൗളിങ്ങിലും ഇന്നൊരു മോശം ദിവസമായിരുന്നു. ആർസിബിയുടെ പ്രകടനം മികച്ചതായിരുന്നു‘, റുതുരാജ് ഗെയ്ക്ക്‌വാദ് മത്സരശേഷം പറഞ്ഞു.

അതേസമയം ഐപിഎല്ലിൽ ചെന്നൈ സൂപ്പർ കിങ്സിനെതിരായ മത്സരത്തിൽ 50 റൺസിന്റെ വിജയമാണ് റോയൽ ചലഞ്ചേഴ്സ് നേടിയത്. ചെപ്പോക്കില്‍ 2008 ന് ശേഷമാണ് ആര്‍സിബി ജയം സ്വന്തമാക്കുന്നത്. ആദ്യം ബാറ്റ് ചെയ്ത് ആര്‍സിബി ഉയര്‍ത്തിയ 197 റണ്‍സ് വിജയലക്ഷ്യത്തിന് മുന്നില്‍ തുടക്കം മുതല്‍ അടിതെറ്റിയ ചെന്നൈയുടെ പോരാട്ടം 20 ഓവറില്‍ എട്ട് വിക്കറ്റ് നഷ്ടത്തില്‍ 146 റണ്‍സില്‍ അവസാനിച്ചു. 41 റണ്‍സെടുത്ത രച്ചിന്‍ രവീന്ദ്രയാണ് ചെന്നൈയുടെ ടോപ് സ്‌കോറര്‍.