ആശാപ്രവർത്തകർക്ക് കൈത്താങ്ങുമായി സുരേഷ് ഗോപി

തിരുവനന്തപുരം: ആശപ്രവർത്തകരുടെ പ്രശ്നങ്ങൾ പരിഹരിക്കാൻ കണ്‍സോര്‍ഷ്യം രൂപീകരിക്കാൻ മുൻകൈയെടുക്കുമെന്നു കേന്ദ്രമന്ത്രി സുരേഷ് ഗോപി. ആദ്യ ഘട്ടത്തില്‍ ഒരുകോടി രൂപ താന്‍ സംഭാവന നല്‍കുമെന്നും ബാക്കി സമൂഹത്തില്‍ നിന്നും സ്വരൂപിക്കുമെന്നും അദ്ദേഹം പറഞ്ഞു. തിരുവനന്തപുരത്ത് എത്തിയാലുടന്‍ ആശമാരുടെ സമരപ്പന്തലില്‍ എത്തി അവരുമായി കൂടിക്കാഴ്ച നടത്തുമെന്നും വിഷയം ചർച്ച ചെയ്യുമെന്നും അദ്ദേഹം പറഞ്ഞു. മരണത്തെ മുഖാമുഖം നേരിട്ടാണ് ആശമാര്‍ കോവിഡ് കാലത്ത് സമൂഹത്തിനു വേണ്ടി പ്രവര്‍ത്തിച്ചത്. അവര്‍ക്കു വേണ്ടി നമുക്ക് ചെയ്യാന്‍ കഴിയുന്നത് ഇതാണ്.

കണ്‍സോര്‍ഷ്യം രൂപീകരിച്ചാൽ ആശമാരുടെ മാസ വരുമാനത്തിനോടൊപ്പം നല്ലൊരു വിഹിതം കൂടി നല്‍കാന്‍ സാധിക്കും. ആദ്യഘട്ടത്തില്‍ ഒരുകോടി രൂപ നല്‍കാന്‍ താന്‍ തയ്യാറാണ്. ബാക്കി സമൂഹത്തില്‍ നിന്നും സ്വരൂപിക്കാം. 25 കോടിയുടെ കണ്‍സോര്‍ഷ്യം രൂപീകരിക്കാനാകും. നല്ല മനസുള്ളവര്‍ ചേര്‍ന്നാല്‍ ഇതിനാകുമെന്നും അദ്ദേഹം പറഞ്ഞു.