പ്രായം വെറും നമ്പർ; മിന്നല്‍ സ്റ്റമ്പിങ്ങുമായി വീണ്ടും ധോണി! തന്ത്രം വെളിപ്പെടുത്തി കൈഫ്

പ്രായം വെറും അക്കമാണെന്ന് വീണ്ടും വീണ്ടും തെളിയിച്ച് കൊണ്ടിരിക്കുകയാണ് മഹേന്ദ്ര സിങ് ധോണി. ആര്‍സിബി താരം ഫില്‍ സാള്‍ട്ടിന് ആലോചിക്കാന്‍ പോലും അവസരം നല്‍കാതെ മിന്നല്‍ വേഗത്തിലായിരുന്നു ധോണിയുടെ സ്റ്റംപിങ്. കഴിഞ്ഞ മത്സരത്തില്‍ സൂര്യകുമാര്‍ യാദവിനെ പുറത്താക്കിയ സ്റ്റംപിങ്ങിനെക്കാള്‍ വേഗതയിലായിരുന്നു ഈ സ്റ്റംപിങ്. സാള്‍ട്ടിന്റെ കാല്‍ വായുവില്‍ പൊന്തി നില്‍ക്കുന്ന സമയത്താണ് സ്റ്റംപിങ് നടത്തിയത്. ക്രീസില്‍ കാലുറപ്പിക്കാന്‍ സാള്‍ട്ടിന് സമയം ലഭിച്ചതുമില്ല.

43 കാരനായ ധോണി ഒരു വര്‍ഷത്തിന് ശഷം വീണ്ടും വിക്കറ്റിന് പിന്നിലെത്തുമ്പോള്‍ താരത്തിന്റെ വേഗതയില്‍ അതിശയിച്ചിരിക്കുകയാണ് ക്രിക്കറ്റ് ലോകം. എന്നാല്‍ ധോണിയുടെ ഈ വേഗതയ്ക്ക് പിന്നിലെ രഹസ്യം പറയുകയാണ് മുന്‍ ഇന്ത്യന്‍ താരം മുഹമ്മദ് കൈഫ്. മറ്റ് ബാറ്റര്‍മാര്‍ സ്റ്റംപിന് കുറെയകലെ കൈകള്‍ വെക്കുമ്പോള്‍ ധോണി സ്റ്റംപിന് ചേര്‍ന്നാണ് കൈകള്‍ വെക്കുന്നതെന്നും അതുകൊണ്ട് തന്നെ കൂടുതല്‍ വേഗതയില്‍ താരത്തിന് വിക്കറ്റിലേക്ക് എത്താന്‍ കഴിയുമെന്നും കൈഫ് പറയുന്നു. ക്ലാസന്‍, സഞ്ജു സാംസണ്‍ തുടങ്ങി വിക്കറ്റ് കീപ്പര്‍മാരുടെ പൊസിഷന്‍ കൂടി എടുത്ത് കാണിച്ചായിരുന്നു കൈഫിന്റെ വിശദീകരണം.