ഐഎസ്എൽ ഫുട്ബോൾ: പ്ലേ ഓഫ് മത്സരങ്ങൾക്ക് നാളെ തുടക്കമാകും

ബെംഗളൂരു: ഐഎസ്എൽ ഫുട്ബോൾ പ്ലേ ഓഫ് മത്സരങ്ങൾക്ക് നാളെ തുടക്കമാകും. ആദ്യ രണ്ട് സ്ഥാനക്കാരായ കൊൽക്കത്ത മോഹൻ ബഗാനും എഫ്സി ഗോവയും നേരിട്ട് സെമിഫൈനലിൽ കടന്നപ്പോൾ മൂന്ന് മുതൽ ആറ് വരെ സ്ഥാനങ്ങളിലുള്ള നാല് ടീമുകളാണ് പ്ലേ ഓഫ് കളിച്ച് സെമി ബെർത്ത് നേടാൻ രംഗത്തുള്ളത്.

അതേസമയം, നാളെ ആദ്യ പ്ലേ ഓഫിൽ ബെംഗളൂരു എഫ്സിയും മുംബൈ സിറ്റി എഫ്സിയും ഏറ്റുമുട്ടും. 30ന് നോർത്ത് ഈസ്റ്റ് യുണൈറ്റഡ് ജംഷഡ്പുർ എഫ്സിയെ നേരിടും. ഈ മത്സരങ്ങളിലെ വിജയികളാകും സെമിഫൈനലിൽ ഗോവയ്ക്കും മോഹൻ ബഗാനും എതിരാളികളായി എത്തുക. ഏപ്രിൽ 2,3,6,7 തീയതികളിലാണ് ഇരുപാദ സെമിഫൈനലുകളും നടക്കുക. ഏപ്രിൽ 12 നായിരിക്കും ഫൈനൽ മത്സരം നടക്കുക.