7 കിലോ കഞ്ചാവുമായി ബംഗാൾ സ്വദേശി ആലുവയിൽ പിടിയിൽ

കൊച്ചി: ബംഗാളില്‍ നിന്ന് ട്രെയിനില്‍ കടത്തിക്കൊണ്ട് വന്ന ഏഴ് കിലോ കഞ്ചാവുമായി ഒരാൾ പിടിയിൽ. ആലുവയിൽ വെച്ചാണ് എക്‌സൈസ് സംഘം പ്രതിയെ പിടികൂടിയത്. അബ്ദുല്ല മാലിത്യ എന്ന ബംഗാൾ സ്വദേശിയാണ് എക്‌സൈസിന്റെ പിടിയിലായത്. ഇയാൾ നാല് പൊതികളിലായാണ് കഞ്ചാവ് കടത്തിക്കൊണ്ട് വന്നത്. ഇതിൽ മൂന്ന് പൊതികളിൽ രണ്ടു കിലോ കഞ്ചാവും മറ്റൊരു പൊതിയിൽ ഒരു കിലോ കഞ്ചാവുമാണ് ഉണ്ടായിരുന്നത്. ഇതോടൊപ്പം കഞ്ചാവ് തൂക്കാനുള്ള ത്രാസും ഇയാളുടെ പക്കൽ നിന്നും പിടിച്ചെടുത്തു.

ആലുവ എടത്തലയില്‍ നിന്നാണ് പ്രതി പിടിയിലായത്. ബംഗാളില്‍ നിന്ന് ട്രെയിനില്‍ വൈകിട്ടോടെ ആലുവ റെയില്‍വെ സ്റ്റേഷനില്‍ എത്തിയ അബ്ദുല്ല രാത്രിയാകും വരെ കാത്തിരുന്നു. തുടർന്ന് അര്‍ധരാത്രി വൈകി വീട്ടിലേക്ക് പോകും വഴിയാണ് എക്സൈസ് സംഘം ഇയാളെ പിടികൂടിയത്. സ്പെഷ്യല്‍ സ്ക്വാഡ് ഇന്‍സ്പെക്ടര്‍ പി. കെ. പ്രമോദ്, പ്രിവന്‍റീവ് ഓഫിസര്‍ ടോമി, സിവില്‍ എക്സൈസ് ഓഫിസര്‍ ശ്രീജിത്ത് എന്നിവരുൾപ്പെടുന്ന സംഘമാണ് ഇയാളെ പിടികൂടിയത്.