തളർച്ച കഴിഞ്ഞു; ഉയരത്തിൽ കുതിച്ച് കാപ്പി വില

ഏറെക്കാലത്തെ ഇടവേളയ്ക്ക് ശേഷം ഉന്മേഷം വീണ്ടെടുത്ത് കാപ്പിക്കുരു. കൽപ്പറ്റ വിപണിയിൽ 500 രൂപയാണ് കാപ്പിക്കുരുവിന് വർധിച്ചത്. അതേസമയം വീണ്ടും ആവശ്യക്കാർ വർധിച്ചതോടെ കുരുമുളക് വിലയും കയറ്റം തുടങ്ങി. കൊച്ചി വിപണിയിൽ അൺഗാർബിൾഡിന് 100 രൂപയാണ് വർധിച്ചത്. കൽപ്പറ്റ മാർക്കറ്റിൽ ഇ‍ഞ്ചിവിലയും മാറിയില്ല.

അതേസമയം കട്ടപ്പന വിപണിയിൽ കൊക്കോ, ഉണക്ക കൊക്കോ വിലകളും മാറ്റമില്ലാതെ തുടരുകയാണ്. കേരളത്തിൽ റബർ വിലയിലും മാറ്റമില്ല. ഈസ്റ്ററും വിഷുവും മുന്നിൽക്കണ്ട് വീണ്ടും ലേല കേന്ദ്രങ്ങൾ കൂടുതൽ സജീവമായി. വില ഇനിയും മെച്ചപ്പെടുമെന്ന പ്രതീക്ഷയിലാണ് കർഷകർ.