സ്പോട്ടിഫൈ ടോപ്പ് 50 ലിസ്റ്റില്‍ സ്ഥാനം പിടിച്ച് ‘അഭിലാഷ’ത്തിലെ ഗാനം

അഭിലാഷം സിനിമയിലെ ഹൃദയം മിടിപ്പിക്കുന്ന സംഗീതം ഇതിനകം സംഗീത പ്രേമികളുടെ മനസ് കീഴടക്കിയിരിക്കുകയാണ്. ഇപ്പോൾ, ചിത്രത്തിലെ ‘തട്ടത്തിൽ’ എന്ന ഗാനം സ്പോട്ടിഫൈ ഇന്ത്യയുടെ ടോപ്പ് 50 വൈറൽ സോങ് ലിസ്റ്റിൽ 20-ാം സ്ഥാനം പിടിച്ചിരിക്കുന്നു. ഇത്രയും വേഗത്തിൽ ഈ നേട്ടം കൈവരിക്കുന്ന മലയാളം ഗാനങ്ങളിൽ ഒന്നു കൂടിയാണ് ഇത്.

ശ്രീഹരി കെ നായർ സംഗീത സംവിധാനം നിർവഹിച്ച ഈ ഗാനത്തിന് ഇതിനോടകം തന്നെ സമൂഹ മാധ്യമങ്ങളിൽ വലിയ സ്വീകരണമാണുള്ളത്. സൈജു കുറുപ്പ്, തൻവി റാം എന്നിവർ കേന്ദ്ര കഥാപാത്രങ്ങളാകുന്ന ഈ പ്രണയകഥ മാർച്ച് 29ന് തിയറ്ററുകളിലെത്തും. റിലീസിന് മുമ്പ് ഗാനത്തിന് ലഭിച്ച ഈ വലിയ പ്രചാരം സിനിമയുടെ പ്രേക്ഷക പിന്തുണ ശക്തിപ്പെടുത്തും എന്നാണ് പ്രതീക്ഷ.