ആറന്മുളയിൽ നിരോധിത പ്ലാസ്റ്റിക് ഉത്‌പന്നങ്ങൾ പിടികൂടി

ആറന്മുള ഗ്രാമപ്പഞ്ചായത്തിലെ കോട്ടയിലുള്ള സ്വകാര്യവ്യക്തിയുടെ ഗോഡൗണിൽ നിന്നും ആയിരത്തോളം കിലോ നിരോധിത പ്ലാസ്റ്റിക് ഉത്‌പന്നങ്ങൾ പിടിച്ചെടുത്തു. ആറന്മുളയിലെയും സമീപപ്രദേശങ്ങളിലെയും വിവിധ കച്ചവട സ്ഥാപനങ്ങളിലേക്ക് വിതരണത്തിനായി സൂക്ഷിച്ചിരുന്ന നിരോധിത പ്ലാസ്റ്റിക് ഉത്‌പന്നങ്ങൾ ആണ് തദ്ദേശസ്വയംഭരണ വകുപ്പ് ജില്ലാ എൻഫോഴ്‌സ്‌മെന്റ് ടീമിന്റെ നേതൃത്വത്തിൽ നടത്തിയ പരിശോധനയിൽ കണ്ടെടുത്തത്.

2019-ൽ സർക്കാർ നിരോധിച്ച പ്ലാസ്റ്റിക് ക്യാരിബാഗുകൾ, പേപ്പർ പ്ലേറ്റുകൾ, പ്ലാസ്റ്റിക് കോട്ടിങ് ഉള്ള പേപ്പർ കപ്പുകൾ, പ്ലാസ്റ്റിക് ഇലകൾ എന്നിവ പിടിച്ചെടുത്ത ഉത്‌പന്നങ്ങളാണ്. വിപണിയിൽ നാല് ലക്ഷത്തോളം രൂപ വരും.