കെഎസ്ആർടിസി ബസ് നിയന്ത്രണം വിട്ട് അപകടം

തിരുവനന്തപുരം: ‍ഡ്രൈവർക്ക് ബിപി കൂടിയതിനെത്തുടർന്ന് കെഎസ്ആർടിസി ബസ് നിയന്ത്രണം വിട്ട് ഇടിച്ച് അപകടം. നെടുമങ്ങാട് വാളിക്കോട് വഴിയോര വിശ്രമ കേന്ദ്രത്തിലേക്ക് ഇടിച്ചു കയറിയ ബസ് സമീപത്തുണ്ടായിരുന്ന 4 ഇരുചക്രവാഹനങ്ങൾ തകർത്ത ശേഷം ഇലക്ട്രിക് പോസ്റ്റിൽ ഇടിച്ചു നിന്നു. ഇന്ന് ഉച്ചയ്ക്ക് രണ്ടരയോടെയാണ് അപകടമുണ്ടായത് ബസ് ഇടിച്ച 4 ഇരുചക്രവാഹനങ്ങൾ പൂർണമായും തകർന്നു. ഇലക്ട്രിക് പോസ്റ്റിന് സമീപത്ത് നിർത്തിയിട്ടിരുന്ന വാഹനങ്ങളാണ് തകർന്നത്. തിരുവനന്തപുരത്ത് നിന്നും വിതുര ഭാ​ഗത്തേക്ക് പോയ ബസാണ് അപകടത്തിപ്പെട്ടത്. പോസ്റ്റിന് സമീപം ബൈക്ക് നിർത്തിയിട്ടവർ വെള്ളം കുടിക്കാൻ കടയിലേക്ക് പോയതിനാൽ വലിയ അപകടമാണ് ഒഴിവായത്. അപകടത്തിൽ ആർക്കും പരിക്കുകളില്ല. ഡ്രൈവർക്ക് ബിപി കൂടിയതാണ് ബസ് നിയന്ത്രണം വിടാൻ കാരണമെന്നാണ് പ്രാഥമിക നി​ഗമനം. ഡ്രൈവറെ നെടുമങ്ങാട് ആശുപത്രിയിൽ പ്രവേശിപ്പിച്ചു.