അലയൻസുമായുള്ള ബന്ധം വേർപ്പെടുത്താൻ ഒരുങ്ങി ബജാജ്

കൊച്ചി: ബജാജ് ഇൻഷുറൻസ് കമ്പനി അലയൻസുമായുള്ള ബന്ധം വേർപെടുത്താൻ ഒരുങ്ങുന്നതായി റിപ്പോർട്ടുകൾ. ഇനി ബജാജും അലയൻസും സ്വന്തം നിലയിൽ ലൈഫ് ഇൻഷുറൻസും മറ്റ് ഇൻഷുറൻസ് പദ്ധതികളും നടത്തുമെന്നാണ് റിപ്പോർട്ടുകൾ സൂചിപ്പിക്കുന്നത്.

സംയുക്ത കമ്പനിയിൽ അലയൻസിന്റെ 26% ഓഹരി ബജാജ് വാങ്ങും. ലൈഫ് ഇൻഷുറൻസിന് 13,780 കോടിയും മറ്റ് ഇൻഷുറൻസ് ബിസിനസിന് 10,400 കോടിയും നൽകിയാണ് ഓഹരികൾ വാങ്ങുന്നത്. ബജാജ് ഫിൻസെർവിനും ബജാജ് ഹോൾഡിങ്സിനും ജമ്നലാൽ ബജാജ് സൺസിനുമായി ഈ ഓഹരികൾ വീതം വെയ്ക്കും.

അതേസമയം ബജാജ് ഹോൾഡിങ്സിന് 20% ഓഹരി ലഭിക്കും. 2000ലാണ് ബജാജും ജർമ്മൻ ധനകാര്യ സേവന കമ്പനിയായ അലയൻസും ചേർന്ന് ഇൻഷുറൻസ് ബിസിനസ് ആരംഭിച്ചത്. സംയുക്ത കമ്പനിക്ക് 40,000 കോടി മൂല്യമുണ്ടെന്ന് ബജാജ് എംഡി സഞ്ജീവ് ബജാജ് പറഞ്ഞു.