ആഗ്രഹം നിലനിൽക്കുന്ന കാലത്തോളം കളിക്കണം: ഐപിഎല്ലിനെക്കുറിച്ച് ധോണി പറഞ്ഞ വാക്കുകൾ പങ്കുവെച്ച് ഹർഭജൻ സിങ്

മഹേന്ദ്ര സിങ് ധോണിക്കൊപ്പം അടുത്ത കാലത്തായി ചിലവഴിച്ച സൗഹൃദ നിമിഷങ്ങളെക്കുറിച്ച് സംസാരിച്ച് മുൻ സഹതാരം ഹർഭജൻ സിങ്. ധോണിയുടെ ഐപിഎൽ തയ്യാറെടുപ്പുകളെക്കുറിച്ചും സംസാരിച്ചെന്നാണ് ഹർഭജൻ പറയുന്നത്.

‘ഞങ്ങളുടെ ഒരു സുഹൃത്തിന്റെ മകളുടെ കല്യാണത്തിന് ഞാൻ ധോണിയെ കണ്ടിരുന്നു. ധോണിക്ക് ഇപ്പോഴും മികച്ച കായികക്ഷമതയുണ്ട്. 44-ാം വയസിൽ എന്താണ് നിങ്ങൾ ചെയ്യാൻ പോകുന്നതെന്ന് ഞാൻ ചോദിച്ചു. ഇതൊക്കെ ബുദ്ധിമുട്ടല്ലേ? തീർച്ചയായും ബുദ്ധിമുട്ടാണെന്നായിരുന്നു ധോണിയുടെ മറുപടി. എന്നാൽ ഐപിഎൽ എനിക്ക് സന്തോഷം നൽകുന്നു. എന്റെയുള്ളിൽ ആഗ്രഹം നിലനിൽക്കുന്ന കാലത്തോളം ഐപിഎൽ കളിക്കണം. ഒരുവർഷം മുഴുവൻ ക്രിക്കറ്റ് കളിക്കാതിരിക്കുന്നത് ബുദ്ധിമുട്ടാണെന്ന് ധോണി മറുപടി നൽകി‘, ഹർഭജൻ പറഞ്ഞു.

അതേസമയം ഇന്ത്യൻ ക്രിക്കറ്റിലെ സഹതാരങ്ങളിൽ ഇപ്പോഴും മികച്ച ബന്ധം തുടരുന്നവരുടെ പേര് ചോദിച്ചപ്പോൾ യുവരാജ് സിങ്ങിന്റെയും ആശിഷ് നെഹ്റയുടെയും പേരാണ് ഹർഭജൻ പറഞ്ഞത്. ഇന്ത്യൻ ക്രിക്കറ്റിൽ ഒരു പതിറ്റാണ്ടോളം ഒരുമിച്ച് കളിച്ചവരാണ് ഹർഭജൻ സിങ്ങും മഹേന്ദ്ര സിങ് ധോണിയും.