ബിഗ് ബജറ്റ് ചിത്രം, മുഫാസ ചിത്രം ഇനി ഒടിടിയിലേക്ക്

കഴിഞ്ഞ വർഷം ക്രിസ്മസ് ദിനത്തിൽ ഒരു കൂട്ടം സിനിമകൾ തിയറ്ററുകളിൽ എത്തിയിരുന്നു. അക്കൂട്ടത്തിൽ ഏറ്റവും ചെലവേറിയ ചിത്രമായിരുന്നു മുഫാസ: ദ ലയൺ കിം​ഗ്. 200 മില്യൺ ഡോളർ മുടക്കി റിലീസ് ചെയ്ത ചിത്രമാണിത്. ലോകമെമ്പാടുമുള്ള സിനിമാസ്വാദകർ ഏറ്റെടുത്ത ദ ലയൺ കിങ്ങിന്റെ പ്രീക്വൽ ആയിരുന്നു. ഇപ്പോഴിതാ തിയറ്റർ റിലീസിന് രണ്ട് മാസത്തിന് ശേഷം മുഫാസ ഒടിടിയിൽ റിലീസിന് ഒരുങ്ങുന്ന റിപ്പോർട്ടാണ് പുറത്ത് വരുന്നത്. ജിയോ ​ഹോട്ട്സ്റ്റാറിനാണ് മുഫാസ ദ ലയൺ കിങ്ങിന്റെ സ്ട്രീമിം​ഗ് അവകാശം വിറ്റു പോയിരിക്കുന്നത്. മാർച്ച് 26 മുതലാണ് സ്ട്രീമിം​ഗ് ആരംഭിക്കുന്നത്. ഇംഗ്ലീഷ്, ഹിന്ദി, തമിഴ്, തെലുങ്ക് എന്നീ ഭഷകളിൽ ചിത്രം ‌എത്തും. റെക്കോർഡ് തുകയ്ക്കാണ് ​ഹോട്ട്സ്റ്റാർ സ്ട്രീമിം​ഗ് അവകാശം വാങ്ങിയതെന്നാണ് റിപ്പോർട്ടുകൾ വരുന്നത്.

അതേസമയം 2024 ഡിസംബർ 20ന് റിലീസ് ചെയ്ത ചിത്രമാണ് മുഫാസ: ദ ലയൺ കിം​ഗ്. ബോക്സ് ഓഫീസിൽ വലിയ കളക്ഷൻ നേടാൻ ചിത്രത്തിന് സാധിച്ചിരുന്നു. റിപ്പോർട്ടുകൾ പ്രകാരം 700 മില്യൺ ​ഡോളറാണ് ഇതുവരെ മുഫാസ കളക്ട് ചെയ്തിരിക്കുന്നത്. അതായത് 6093 കോടിയിലധികം രൂപയാണ് ചിത്രം നേടിയത്. കഴിഞ്ഞ വർഷം റിലീസ് ചെയ്ത സിനിമകളിൽ ഏറ്റവും കൂടുതൽ കളക്ഷൻ നേടിയ ടോപ് 10 ചിത്രങ്ങളിൽ ഒന്നും മുഫാസയാണ്.