പട്ടാപ്പകൽ നടുറോട്ടിലൂടെ കാട്ടുപന്നികളുടെ കൂട്ടയോട്ടം

മലപ്പുറം: പട്ടാപ്പകൽ നടുറോട്ടിലൂടെ കാട്ടുപന്നികളുടെ കൂട്ടയോട്ടം. വണ്ടൂരിലായിരുന്നു സംഭവം. കാപ്പിൽ അങ്ങാടിയിൽ ബസ് വെയിറ്റിങ് ഷെഡിനു സമീപം റോഡിലൂടെ ഒരു കൂട്ടം കാട്ടുപന്നികളാണ് പാഞ്ഞത്. ഇന്നലെ വൈകിട്ട് 6 മണിയോടെയായിരുന്നു സംഭവം. റോഡിൽ നിരവധിയാളുകളുള്ള സമയത്താണ് പത്തിലധികം കാട്ടുപന്നികൾ റോഡിലൂടെ ചീറിപ്പാഞ്ഞത്.

കാട്ടുപന്നികൾ ഓടിപ്പോകുന്നതിന്റെ സിസിടിവി ദൃശ്യങ്ങളും ലഭ്യമായിട്ടുണ്ട്. ഈ സമയം എതിരെ കാൽനട യാത്രക്കാരോ വാഹനങ്ങളോ വരാതിരുന്നത് രക്ഷയായെന്ന് പ്രദേശവാസികൾ പറഞ്ഞു. കഴിഞ്ഞ ദിവസം നടുവത്ത് മൂച്ചിക്കൽ ഭാഗങ്ങളിൽ കാട്ടുപന്നിയുടെ ശല്യമുണ്ടായതായി നാട്ടുകാർ പരാതിപ്പെട്ടിരുന്നു. മേഖലയിൽ കാട്ടുപന്നികൾ വ്യാപക കൃഷി നാശം വരുത്തിയിരുന്നു. പ്രദേശത്ത് ഇവയുടെ ശല്യം രൂക്ഷമാണെന്നും പ്രദേശവാസികൾ ആരോപിച്ചു.