കന്നഡ നടി രന്യ റാവു അറസ്റ്റില്‍

കന്നഡ നടി രന്യ റാവു അറസ്റ്റില്‍. ദുബായിയില്‍ നിന്നും ബെംഗളൂരുവിലേക്ക് സ്വര്‍ണം കടത്താന്‍ ശ്രമിച്ചതിനാണ് രന്യ റാവുവിനെ ഡിആര്‍ഐ സംഘം അറസ്റ്റ് ചെയ്തത്. ആഭരണങ്ങളായി അണിഞ്ഞും ശരീരത്തില്‍ ഒളിപ്പിച്ചും സ്വര്‍ണം കടത്താനായിരുന്നു ശ്രമം. 14.8 കിലോ ഗ്രാം സ്വര്‍ണം ഇവരില്‍ നിന്നും റവന്യൂ ഇന്റലിജന്‍സ് കണ്ടെടുത്തു.

കഴിഞ്ഞ രണ്ടാഴ്ചക്കിടെ നാല് തവണ നടി ദുബായ് സന്ദര്‍ശനം നടത്തിയതോടെ ഡിആര്‍ഐയുടെ നിരീക്ഷണത്തിലാകുകയായിരുന്നു. ദുബായില്‍ നിന്നും തിങ്കളാഴ്ച രാത്രി ബെംഗളൂരുവില്‍ പറന്നിറങ്ങിയപ്പോളാണ് അറസ്റ്റ് രേഖപ്പെടുത്തിയത്. കര്‍ണാടകയിലെ ഉന്നത പൊലീസ് ഉദ്യോഗസ്ഥന്റെ മകളാണെന്ന് പറഞ്ഞ് പരിശോധനയില്‍ നിന്ന് രക്ഷപ്പെടാന്‍ രന്യ റാവു ശ്രമിച്ചെങ്കിലും റവന്യു ഇന്റലിജന്‍സ് സംഘം പിടിവിട്ടില്ല. നടിയെ പൊലീസ് കസ്റ്റഡിയിലെടുത്തു.