പതിനാറ് വയസുകാരന് നേരെ ലൈംഗികാതിക്രമം; പ്രതിക്ക് 13 വര്‍ഷം തടവും 1.5 ലക്ഷം പിഴയും

തൃശൂർ: ചാവക്കാട് പതിനാറ് വയസുകാരനെ ലൈംഗികമായി ഉപദ്രവിച്ച കേസില്‍ പ്രതിക്ക് ശിക്ഷ വിധിച്ച് കോടതി. 13 വർഷം തടവും 1.5 ലക്ഷം രൂപ പിഴയുമാണ് ശിക്ഷ വിധിച്ചത്. വാടാനപ്പള്ളി മൊയ്തീന്‍പള്ളി വലിയകത്ത് ഷമീറി(42)നെയാണ് ശിക്ഷിച്ചത്. ചാവക്കാട് അതിവേഗ സ്‌പെഷ്യല്‍ കോടതി ജഡ്ജി അന്‍യാസ് തയ്യിലാണ് ശിക്ഷ വിധിച്ചത്. പിഴ തുക അടച്ചില്ലെങ്കിൽ 9 മാസം കൂടി അധിക തടവ് അനുഭവിക്കണമെന്നും കോടതി പറഞ്ഞു.

കേസിനാസ്പദമായ സംഭവമുണ്ടായത് 2023 ഒക്ടോബര്‍ 8-നായിരുന്നു. ലൈംഗികാതിക്രമം നേരിട്ട് ആൺ കുട്ടിയോട് പുതുതായി പണിയുന്ന വീട് കാണിച്ച് തരാനായി ആവശ്യപ്പെട്ട് കൂട്ടിക്കൊണ്ട് പോകുകയും, വീട്ടിനുള്ളിൽ വെച്ച് കുട്ടിയുടെ എതിർപ്പ് വകവെക്കാതെ പ്രതി ലൈംഗികമായി ഉപദ്രവിക്കുകയും ചെയ്തു. അടുക്കളയിൽ വെച്ചും മുറിയിൽ വെച്ചും പ്രതി കുട്ടിയെ പലതവണ ലൈംഗികമായി ഉപദ്രവിച്ചെന്നാണ് പ്രോസിക്യൂഷൻ വാദം. പ്രതി പോയ ശേഷം കുട്ടി അമ്മയോട് വിവരം പറയുകയും തുടർന്ന് മാതാപിതാക്കൾ വാടാനപ്പള്ളി പോലീസ് സ്റ്റേഷനില്‍ എത്തി പരാതി നൽകുകയുമായിരുന്നു.