ജീവിതത്തിലെ ഏറ്റവും വലിയ സമ്മാനം; സന്തോഷവാർത്ത പങ്കുവെച്ച് കിയാരയും സിദ്ധാര്‍ത്ഥും

ബോളിവുഡിന്റെ പ്രിയ താരദമ്പതികളാണ് നടന്‍ സിദ്ധാര്‍ഥ് മല്‍ഹോത്രയും നടി കിയാര അദ്വാനിയും. 2023ലാണ് ഇരുവരും വിവാഹിതരായത്. ഇപ്പോഴിതാ ജീവിതത്തിലെ ഒരു സന്തോഷ നിമിഷം ആരാധകരുമായി പങ്കുവച്ചിരിക്കുകയാണ് കിയാരയും സിദ്ധാര്‍ഥും. മാതാപിതാക്കളാകാന്‍ പോകുന്ന വിവരമാണ് ഇരുവരും സമൂഹമാധ്യമങ്ങളിലൂടെ അറിയിച്ചിരിക്കുന്നത്.

‘ജീവിതത്തിലെ ഏറ്റവും വലിയ സമ്മാനം, ഇതാ വരുന്നു’ എന്നാണ് ഇരുവരും ഇന്‍സ്റ്റഗ്രാമില്‍ കുറിച്ചത്. കുഞ്ഞു സോക്സുകളുടെ ചിത്രവും ഇതിനൊപ്പം പങ്കുവെച്ചിട്ടുണ്ട്. പോസ്റ്റിന് കീഴെ നിരവധി പേരാണ് ആശംസകളുമായി എത്തിയത്. ‘ഏറ്റവും മികച്ച സമയം വരാന്‍ പോകുന്നു, ദൈവം നിങ്ങള്‍ അനുഗ്രഹിക്കട്ടെ’ എന്നാണ് കരീന കപൂറിന്റെ കമന്റ്. സമാന്ത റുത്ത് പ്രഭു, നേഹ സക്സേന, രകുല്‍ പ്രീത്, വരുണ്‍ ധവാന്‍, നേഹ ധൂപിയ, രാശി ഖന്ന, അലിയ ഭട്ട്, ശില്‍പ ഷെട്ടി, ജാക്കലിന്‍ ഫെര്‍ണാണ്ടസ്, സൊനാക്ഷി സിന്‍ഹ, രശ്മിക മന്ദാന, പേളി മാണി തുടങ്ങി നിരവധി സെലിബ്രേറ്റികളുടെ കമന്റും പോസ്റ്റിന് താഴെയുണ്ട്.