സ്റ്റാര്‍ഷിപ്പ് റോക്കറ്റിന്‍റെ എട്ടാം പരീക്ഷണ വിക്ഷേപണം സ്പേസ് എക്‌സ് നീട്ടിവച്ചു

ടെക്സസ്: സ്റ്റാര്‍ഷിപ്പ് റോക്കറ്റിന്‍റെ എട്ടാം പരീക്ഷണ വിക്ഷേപണം സ്പേസ് എക്‌സ് നീട്ടിവച്ചു. ഇന്ന് സ്റ്റാര്‍ഷിപ്പിന്‍റെ എട്ടാം പരീക്ഷണ വിക്ഷേപണം നടത്താനാണ് സ്പേസ് എക്സ് തീരുമാനിച്ചിരുന്നത്. എന്നാല്‍ മാര്‍ച്ച് 3നായിരിക്കും വിക്ഷേപണം എന്ന് കമ്പനി ട്വീറ്റ് ചെയ്തു.

ഏറ്റവും ഭാരം വഹിക്കുന്ന റോക്കറ്റാണ് സ്പേസ് എക്സിന്‍റെ സ്റ്റാര്‍ഷിപ്പ്. പൂര്‍ണമായും പുനരുപയോഗിക്കാന്‍ ലക്ഷ്യമിടുന്ന ബഹിരാകാശ വിക്ഷേപണ വാഹനം കൂടിയാണിത്. ചൊവ്വയിലേക്ക് അടക്കമുള്ള ഭാവി യാത്രകള്‍ ലക്ഷ്യമിട്ടാണ് ഇത് കമ്പനി നിര്‍മിച്ചിരിക്കുന്നത്. 121 മീറ്ററാണ് സ്റ്റാര്‍ഷിപ്പ് മെഗാ റോക്കറ്റിന്‍റെ ആകെ ഉയരം.

അതേസമയം സൂപ്പർ ഹെവി ബൂസ്റ്റര്‍, സ്റ്റാര്‍ഷിപ്പ് സ്പേസ്‌ക്രാഫ്റ്റ് (ഷിപ്പ്) എന്നീ രണ്ട് ഭാഗങ്ങള്‍ ഈ വിക്ഷേപണ വാഹനത്തിനുണ്ട്. സൂപ്പര്‍ ഹെവി ബൂസ്റ്ററിന് മാത്രം 71 മീറ്ററാണ് ഉയരം. 33 റാപ്റ്റര്‍ എഞ്ചിനുകളാണ് സൂപ്പര്‍ ഹെവി ബൂസ്റ്ററിന്‍റെ കരുത്ത്. സൂപ്പർ ഹെവി ബൂസ്റ്ററിന് വലിയ പേലോഡുകൾ ബഹിരാകാശത്തേക്ക് ഉയർത്താൻ കഴിയും.

സ്റ്റാര്‍ഷിപ്പിന്‍റെ ബൂസ്റ്റര്‍, ഷിപ്പ് ഭാഗങ്ങള്‍ വിക്ഷേപണത്തിന് ശേഷം ഭൂമിയില്‍ തിരിച്ചെത്തിച്ച് പുനരുപയോഗികാണാൻ സ്പേസ് എക്സിന്റെ ലക്ഷ്യം. ഇതുവഴി ചന്ദ്രനിലേക്കും ചൊവ്വയിലേക്കുമുള്ള ദൗത്യങ്ങളുടെ ചിലവ് കുറയ്ക്കാം എന്ന് സ്പേസ് എക്സ് കണക്കുകൂട്ടുന്നു. സ്റ്റാര്‍ഷിപ്പ് സൂപ്പര്‍ ഹെവി റോക്കറ്റിന്‍റെ ഏഴാം പരീക്ഷണ വിക്ഷേപണം ജനുവരി 17ന് പരാജയമായിരുന്നു. വിക്ഷേപണത്തിന് എട്ട് മിനിറ്റുകള്‍ക്ക് ശേഷം മുകളിലെ ഷിപ്പ് ഭാഗം ബഹിരാകാശത്ത് വച്ച് പൊട്ടിത്തെറിക്കുകയായിരുന്നു.