നേടിയത് മൂന്ന് ദേശീയ അവാർഡുകൾ;ദിൽ തോ പാഗൽ ഹെ ചിത്രം വീണ്ടും തിയേറ്ററുകളിലേക്ക്

ഷാരൂഖ് ഖാന്‍ നായകനായി എത്തിയ ചിത്രം ‘ദിൽ തോ പാഗൽ ഹെ’ വീണ്ടും ബിഗ് സ്‌ക്രീനിൽ എത്തുന്നു. ഷാരൂഖിനൊപ്പം മാധുരി ദീക്ഷിതും കരിഷ്മ കപൂറും പ്രധാന കഥാപാത്രങ്ങളായി എത്തിയ ദിൽ തോ പാഗൽ ഹെ ഫെബ്രുവരി 28 ന് വീണ്ടും തിയേറ്ററുകളിൽ എത്തുമെന്നാണ് യാഷ് രാജ് ഫിലിംസ് തിങ്കളാഴ്ച പ്രഖ്യാപിച്ചത്. യാഷ് ചോപ്ര സംവിധാനം ചെയ്ത ‘ദിൽ തോ പാഗൽ ഹെ’ 1997 ലാണ് ആദ്യം പുറത്തിറങ്ങിയത്. ചിത്രത്തിൽ അക്ഷയ് കുമാർ ഒരു പ്രത്യേക കഥാപാത്രത്തെ അവതരിപ്പിച്ചിരുന്നു. മികച്ച വിനോദ ചിത്രം, മികച്ച സഹനടി (കരിഷ്മ കപൂർ), മികച്ച നൃത്തസംവിധാനം (ഷൈമാക് ദാവർ) എന്നിവയ്ക്കുള്ള മൂന്ന് ദേശീയ അവാർഡുകൾ ചിത്രത്തിന് ലഭിച്ചിരുന്നു.

അടുത്തിടെ ബോളിവുഡില്‍ റീ റിലീസ് ചെയ്ത പ്രണയ ചിത്രങ്ങള്‍ വന്‍ നേട്ടം കൈവരിച്ചിരുന്നു. 2016-ൽ രാധിക റാവു വിനയ് സപ്രു എന്നിവര്‍ ചേര്‍ന്ന് സംവിധാനം ചെയ്ത ചിത്രമാണ് സനം തേരി കസം. ഹൃദ്യമായ ഒരു പ്രണയ കഥയാണ് ചിത്രം പറഞ്ഞത്. ഹർഷവർദ്ധൻ റാണെ, മാവ്ര ഹോകെൻ എന്നിവർ പ്രധാന വേഷങ്ങളിൽ അഭിനയിച്ച സനം തേരി കസം അന്ന് റിലീസ് ചെയ്തപ്പോള്‍ അതിലെ സംഗീതം ശ്രദ്ധിക്കപ്പെട്ടെങ്കിലും ബോക്സോഫീസില്‍ 9 കോടി രൂപയുടെ കളക്ഷന്‍ നേടി ഫ്ലോപ്പായി പ്രഖ്യാപിക്കപ്പെട്ടിരുന്നു.

എന്നാല്‍ ചിത്രം 2025 ല്‍ പ്രണയദിനത്തിനോട് അനുബന്ധിച്ച് റിലീസ് ചെയ്തപ്പോൾ വന്‍ വിജയമാണ് ബോളിവുഡ് ബോക്സോഫീസില്‍ നേടിയത്. ജുനൈദ് ഖാൻ-ഖുഷി കപൂർ ചിത്രം ലൗയാപ്, ഹിമേഷ് രേഷ്മിയയുടെ ബാ‍ഡാസ് രവികുമാർ എന്നിവയുൾപ്പെടെ ഫെബ്രുവരി 7-ലെ മറ്റ് റിലീസുകളെക്കാൾ മികച്ച പ്രകടനം സനം തേരി കസം നേടിയിരുന്നു.