ബോളിവുഡിലെ സർവ്വകാലഹിറ്റുകളിൽ ഒന്നായ ‘ദിൽ തോ പാഗൽ ഹേ’ വീണ്ടും തീയറ്ററുകളിലേക്ക്. ഷാരൂഖ് ഖാൻ നായകനായി എത്തി പ്രേക്ഷക ഹൃദയം കീഴടക്കിയ സിനിമയാണ് വീണ്ടും തിയേറ്ററിലേക്ക് എത്തുന്നത്. യഷ് ചോപ്ര സംവിധാനം ചെയ്ത ഈ റൊമാന്റിക് കോമഡി ചിത്രം ഷാരൂഖ് ഖാൻ, മാധുരി ദീക്ഷിത്, കരിഷ്മ കപൂർ ത്രികോണ പ്രണയകഥയാണ് പറയുന്നത്. തിയേറ്ററുകളെ ഹരംകൊള്ളിച്ച ദിൽ തോ പാഗൽ ഹെ ഫെബ്രുവരി 28 ന് തിയേറ്ററുകളിൽ എത്തുമെന്ന് യാഷ് രാജ് ഫിലിംസ് അറിയിച്ചു. പി.വി.ആർ ഐനോക്സ് സ്‌ക്രീനുകളിലാണ് ചിത്രം വീണ്ടുമെത്തിക്കുന്നത്.
യാഷ് ചോപ്ര സംവിധാനം ചെയ്ത് 1997-ൽ പുറത്തിറങ്ങിയ സംഗീത പ്രണയ ചിത്രമാണ് ദിൽ തോ പാഗൽ ഹേ. ടിക്കറ്റ് കൗണ്ടറിൽ പണം വാരിക്കൂട്ടിയതിന് പുറമേ ആ വർഷത്തെ ഏറ്റവും വലിയ കളക്ഷൻ നേടിയ ചിത്രവും ഇതായിരുന്നു. ബോർഡറിന് ശേഷം 1997-ലെ ഏറ്റവും വലിയ വരുമാനം നേടിയ ചിത്രമായിരുന്നു ‘ദിൽ തോ പാഗൽ ഹേ’.
1998-ൽ മികച്ച ജനപ്രിയ ചിത്രത്തിനുള്ള മൂന്ന് ദേശീയ അവാർഡുകളും കരിഷ്മക്ക് മികച്ച സഹനടിക്കുള്ള അവാർഡും സിനിമ നേടിയിരുന്നു. ചിത്രം പുറത്തിറങ്ങി വർഷങ്ങൾ കഴിഞ്ഞിട്ടും അതിന്‍റെ സംഗീതം, നൃത്തസംവിധാനം, പ്രധാന കഥാപാത്രങ്ങൾ എന്നിവ ഇപ്പോഴും ആഘോഷിക്കപ്പെടുന്നതിൽ മനസിലാക്കാം ചിത്രത്തിന്‍റെ ഹൈപ്പ്.
