വയനാട് പുൽപ്പള്ളിയിൽ കാട്ടാനയെ പരിക്കേറ്റ നിലയിൽ കണ്ടെത്തി

സുൽത്താൻ ബത്തേരി: വനമേഖലയിൽ കാട്ടാന പരിക്കേറ്റ നിലയിൽ. വയനാട് സുൽത്താൻ ബത്തേരി പുൽപ്പള്ളി കൊളറാട്ട്കുന്നിലാണ് കാട്ടാനയെ പരിക്കേറ്റ നിലയിൽ കണ്ടെത്തിയത്. കാട്ടാനയുടെ മുൻ കാലിനാണ് പരിക്കേറ്റിരിക്കുന്നത്. പരിക്കേറ്റ കാലുമായി വളരെ ബുദ്ധിമുട്ടിയാണ് കാട്ടാന നടക്കുന്നത്. ചതുപ്പ് നിറ‍ഞ്ഞ സ്ഥലങ്ങളിലും ജലാശയത്തിലും നിലയുറപ്പിച്ച ആനയുടെ ദൃശ്യങ്ങൾ പുറത്ത്.

വെറ്ററിനറി ഫോറസ്റ്റ് ഓഫീസർ ഡോക്ടർ അജേഷ് മോഹൻദാസിന്‍റെ നേതൃത്വത്തിലുള്ള സംഘം ആനയെ പരിശോധിച്ചു. മറ്റൊരു ആനയുമായി ഏറ്റുമുട്ടി പരിക്കേറ്റതാണെന്നാണ് നിഗമനം. കാട്ടാനയുടെ സഞ്ചാരം വനത്തിനുള്ളിൽ നിരീക്ഷിക്കുന്നുണ്ടെന്ന് വനം വകുപ്പ് അറിയിച്ചു. മുൻകാലിൽ മുറിവ് ആഴത്തിലുള്ളതാണെന്നാണ് സൂചന.