അപ്പാർട്ട്മെൻ്റിന്റെ ചുവരിനും ലിഫ്റ്റിനുമിടയിൽ ആറ് വയസുകാരൻ കുടുങ്ങി കിടന്നത് മൂന്ന് മണിക്കൂർ; ലിഫ്റ്റിൻ്റെ വാതിൽ പൊളിച്ച് ഒടുവിൽ രക്ഷാപ്രവർത്തനം

ഹൈദരാബാദ്: അപ്പാർട്ട്മെൻ്റിന്റെ ചുവരിനും ലിഫ്റ്റിനുമിടയിൽ ആറ് വയസുകാരൻ കുടുങ്ങി കിടന്നത് മൂന്ന് മണിക്കൂറോളം. ആന്ധ്രാപ്രദേശിലെ ശാന്തിന​ഗറിലാണ് സംഭവം. പിതാവിൻ്റെ സഹോദരിയെ കാണാൻ പോയ കുട്ടി ലിഫറ്റിനിടയിൽ കുടുങ്ങുകയായിരുന്നു. സംഭവം അറിഞ്ഞയുടൻ അപ്പാർട്ടമെൻ്റ് അധികൃതർ അ​ഗ്നിരക്ഷാ സേനയെ അറിയിച്ചു. പിന്നാലെ ദുരന്ത നിവാരണ സേനയും അ​ഗ്നിരക്ഷാ സേനയും ചേർന്ന് കുട്ടിയെ രക്ഷപ്പെടുത്തി. മൂന്ന് മണിക്കൂറോളം കുടുങ്ങി കിടന്ന കുട്ടിയെ ലിഫ്റ്റിൻ്റെ വാതിൽ പൊളിച്ചാണ് പുറത്തെടുത്തത്.

അപ്പാർട്ട്മെൻ്റിൻ്റെ ഏറ്റവും അടിയിലത്തെ നിലക്കും ഒന്നാം നിലക്കും ഇടയിലായാണ് കുട്ടി കുടുങ്ങി കിടന്നത്. ലിഫ്റ്റിൻ്റെയും ചുവരിൻ്റെയും ഇടയിൽ വയർ കുടുങ്ങിയതിനാൽ ശരീരത്തിനുള്ളിൽ രക്തസ്രാവമുണ്ടാകുമോ എന്ന സംശയം ഉണ്ടായിരുന്നു. പുറത്തെടുത്ത ഉടനെ കുട്ടിയെ സമീപത്തെ ആശുപത്രിയിൽ പ്രവേശിപ്പിച്ചു. കുട്ടിക്ക് ചെറിയ പരിക്കുകളുണ്ട്. എന്നാൽ, നിലവിൽ ആരോഗ്യ നില തൃപ്തികരമാണെന്ന് ഡോക്ടർമാർ അറിയിച്ചു.