താമരശ്ശേരി ചുരത്തിൽ ലോറി നിയന്ത്രണംവിട്ട് പിന്നിലേക്ക് നീങ്ങി; പുറകിൽ വാഹനങ്ങളുടെ കൂട്ടയിടി; നാല് പേർക്ക് പരിക്ക്

കോഴിക്കോട്: താമരശ്ശേരി ചുരത്തില്‍ നിയന്ത്രണം വിട്ട ലോറി പിന്നിലേക്ക് നീങ്ങി അപകടം. ലോറി പിന്നിലുണ്ടായിരുന്ന പിക്കപ്പ് വാനിലിടിച്ചതിനെത്തുടർന്ന് പിക്കപ്പ് വാൻ പുറകിൽ വന്ന ട്രാവലറിൽ ഇടിച്ചു കയറി. അപകടത്തില്‍ നാല് പേര്‍ക്ക് പരിക്കേറ്റു. ചിപ്പിലിത്തോടിന് സമീപം ചുരം കയറുകയായിരുന്ന ലോറി നിയന്ത്രണം നഷ്ടമായി പിറകിലേക്ക് നീങ്ങുകയായിരുന്നു. ഇന്ന് പുലര്‍ച്ചെ 5.30ഓടെയാണ് അപകടമുണ്ടായത്.

പിക്കപ്പ് ഡ്രൈവര്‍ അബ്ദുല്‍ ഹക്കിം, കാസിം എന്നിവര്‍ക്ക് പരിക്കേറ്റു. ഇവരുടെ കൂടെയുണ്ടായിരുന്ന രണ്ട് പേര്‍ക്ക് കൂടി നിസ്സാര പരിക്കേറ്റിട്ടുണ്ട്. മഞ്ചേരിയില്‍ നിന്ന് മൈസൂരിലേക്ക് പച്ചക്കറി എടുക്കാനായി പോവുകയായിരുന്നു ഇവര്‍. താമരശ്ശേരി ചുരം സംരക്ഷണ സമിതി പ്രവര്‍ത്തകരാണ് രക്ഷാപ്രവര്‍ത്തനം നടത്തിയത്.