ഇതിഹാസ അമേരിക്കന്‍ താരം വീനസ് വില്ല്യംസ് വീണ്ടും മൈതാനത്തേക്ക്

കാലിഫോര്‍ണിയ: ഇതിഹാസ അമേരിക്കന്‍ താരവും ഏഴ് വട്ടം ഗ്രാന്‍ഡ്സ്ലാം കിരീടം നേടുകയും ചെയ്ത വീനസ് വില്ല്യംസ് വീണ്ടും ടെന്നീസ് കോര്‍ട്ടിലേക്ക് തിരിച്ചെത്തുന്നു. ഏതാണ്ട് ഒരു വർഷത്തോളം മത്സര രംഗത്ത് നിന്നും വിട്ട് നിന്ന താരം 44ാം വയസ്സിലാണ് വീണ്ടും തിരിച്ചെത്തുന്നത്.

കാലിഫോര്‍ണിയയില്‍ അടുത്ത മാസം തുടങ്ങാനിരിക്കുന്ന ബിഎന്‍ബി പരിബാസ് ഓപ്പണ്‍ (ഇന്ത്യന്‍ വെല്‍സ്) പോരാട്ടത്തില്‍ താരം കളിക്കുമെന്നാണ് വിവരം. വൈല്‍ഡ് കാര്‍ഡ് എൻട്രിയിലൂടെയാണ് താരം വീണ്ടും മത്സരിക്കാനിറങ്ങുന്നത്. ഇതിഹാസ താരം സെറീന വില്ല്യംസിന്റെ സഹോദരി കൂടിയായ വീനസ് 2024 മാര്‍ച്ചില്‍ മയാമി ഓപ്പണ്‍ കളിച്ചിരുന്നു.

പിന്നീട് മത്സരരംഗത്ത് നിന്നും പിന്‍വാങ്ങി. അന്ന് ആദ്യ റൗണ്ടില്‍ തന്നെ പരാജയപ്പെട്ട് വീനസ് പുറത്താകുകയായിരുന്നു. 5 വിംബിള്‍ഡണ്‍ കിരീടങ്ങളും 2 യുഎസ് ഓപ്പണ്‍ കിരീടങ്ങളും സിംഗിള്‍സില്‍ നേടിയ താരമാണ് വീനസ്. സെറീനയ്‌ക്കൊപ്പം 14 ഗ്രാന്‍ഡ്സ്ലാം വനിതാ ഡബിള്‍സ് കിരീട നേട്ടങ്ങളിലും പങ്കാളിയാട്ടുണ്ട്.