ഈ വർഷത്തെ ചാമ്പ്യൻസ് ട്രോഫി കിരീടം ഇന്ത്യയ്ക്കായിരിക്കും; മൈക്കൽ ക്ലാർക്ക്

ഈ വർഷത്തെ ചാമ്പ്യൻസ് ട്രോഫി കിരീടം ഇന്ത്യയ്ക്കായിരിക്കുമെന്ന് മുൻ ഓസ്‌ട്രേലിയൻ ക്യാപ്റ്റൻ മൈക്കൽ ക്ലാർക്ക്. ടൂർണമെന്റിൽ ഏറ്റവും കൂടുതൽ റൺസ് നേടുന്ന കളിക്കാരൻ രോഹിത് ശർമയായിരിക്കുമെന്നും അദ്ദേഹം പറഞ്ഞു. വ്യക്തമായ നിരീക്ഷണങ്ങളുടെ അടിസ്ഥാനത്തിലാണ് തന്റെ ഈ പ്രവചനമെന്നും ക്ലാർക്ക് കൂട്ടിച്ചേർത്തു.

അതേസമയം ഇംഗ്ലണ്ടിനെതിരായ ഏകദിന പരമ്പരയിൽ 3-0 ന് വിജയിച്ചതിന്റെ ആത്മവിശ്വാസത്തിലാണ് ഇന്ത്യ ടൂർണമെന്റിലേക്ക് പ്രവേശിക്കുന്നത്. കട്ടക്ക് ഏകദിനത്തിൽ 90 പന്തിൽ നിന്ന് 119 റൺസ് നേടി രോഹിത് പരമ്പരയിൽ ഫോമിലേക്ക് തിരിച്ചുവന്നു.

രോഹിത് വീണ്ടും കുറച്ചധികം റൺസ് നേടുന്നത് കാണാൻ താൻ ആഗ്രഹിക്കുന്നു വെന്നും താരത്തിന്റെ പ്രകടനം ഇന്ത്യയുടെ കിരീട വിജയത്തിൽ നിർണായകമാകുമെന്നും ക്ലാർക്ക് പറഞ്ഞു. ഇതുകൂടാതെ ടൂർണമെന്റിൽ ഏറ്റവും കൂടുതൽ വിക്കറ്റ് നേടുന്ന ബോളറെയും ക്ലാർക്ക് തിരഞ്ഞെടുത്തു. ഇംഗ്ലണ്ട് പേസ് ബോളർ ജോഫ്ര ആർച്ചറെയാണ് ലീഡിങ് വിക്കറ്റ് ടേക്കറായി ക്ലാർക്ക് പ്രവചിച്ചത്. ടൂർണമെന്റിന്റെ താരമായി തിരഞ്ഞെടുക്കുക ഓസീസ് താരം ട്രാവിസ് ഹെഡിനെയാകുമെന്നും ക്ലാർക്ക് പറഞ്ഞു.