ഡൽഹി മുഖ്യമന്ത്രി അതിഷി രാജിക്കത്ത് നൽകി; പിന്നാലെ നിയമസഭ പിരിച്ചുവിട്ടു

ഡൽഹി: ഡൽഹിയിൽ സര്‍ക്കാര്‍ രൂപീകരിക്കാനുള്ള നിർണ്ണായക നീക്കങ്ങൾ. അമിത് ഷായുടെ വീട്ടിൽ ചര്‍ച്ചകള്‍ നടക്കുകയാണെന്ന് റിപ്പോർട്ട്. ഇതിനിടെ, നിലവിലെ ഡൽഹി മുഖ്യമന്ത്രി അതിഷ മര്‍ലേന രാജി കത്ത് നൽകി. ഡൽഹി ലെഫ്റ്റനന്‍റ് ഗവര്‍ണര്‍ക്ക് രാജി കത്ത് നൽകിയതിനു പിന്നാലെ ഡൽഹി നിയമസഭ പിരിച്ചുവിട്ടതായി ലെഫ്റ്റനൻറ് ഗവര്‍ണര്‍ ഉത്തരവിറക്കി. സര്‍ക്കാര്‍ രൂപീകരണത്തിനുള്ള തിരക്കിട്ട ചര്‍ച്ചകളാണ് അമിത് ഷായുടെ വസതിയിൽ നടന്നത്.

ബിജെപി അധ്യക്ഷൻ ജെപി നദ്ദയും വസതിയിലെത്തി. ബിജെപി ഡൽഹി അധ്യക്ഷൻ വീരേന്ദ്ര സച്ചിദേവയും യോഗത്തിൽ പങ്കെടുക്കുന്നുണ്ട്. ഇതിനിടെ, അരവിന്ദ് കെജ്രിവാളിനെ തോൽപ്പിച്ച ബിജെപി നേതാവ് പര്‍വേഷ് വര്‍മ്മയും കൈലാസ് ഗെഹലോട്ടും ലെഫ്റ്റ്നന്‍റ് ഗവര്‍ണരെ കാണാനെത്തി. ആരായിരിക്കും മുഖ്യമന്ത്രിയെന്നകാര്യത്തിൽ ഇതുവരെ അന്തിമ തീരുമാനമായിട്ടില്ലെന്നാണ് പാര്‍ട്ടി വൃത്തങ്ങള്‍ അറിയിക്കുന്നത്.