പ്ലാസ്റ്റിക് വിമുക്ത വേമ്പനാട് കാമ്പയിന്‍ രണ്ടാം ഘട്ടം നാളെ; 19 പഞ്ചായത്തുകളില്‍ ശുചീകരണം

വേമ്പനാട് കായല്‍ പുനരുജ്ജീവനവും സംരക്ഷണവും ലക്ഷ്യമിട്ടുള്ള ‘പ്ലാസ്റ്റിക് വിമുക്ത വേമ്പനാട്’ കാമ്പയിൻ രണ്ടാം ഘട്ടം നാളെ നടക്കും. ജില്ലാതല ഉദ്ഘാടനം തൈക്കാട്ടുശ്ശേരി ഫെറിയിൽ രാവിലെ ഏഴു മണിക്ക് പ്രിൻസിപ്പൽ ഡിസ്ട്രിക്ട് ആൻ്റ് സെഷൻസ് ജഡ്ജി കെ കെ ബാലകൃഷ്ണൻ നിർവഹിക്കും. ജില്ലാ കളക്ടർ അലക്സ് വർഗീസ് മുഖ്യ പ്രഭാഷണം നടത്തും. പട്ടണക്കാട് ബ്ലോക്ക് പഞ്ചായത്ത് പ്രസിഡന്റ് മേരി ടെൽഷ്യ അധ്യക്ഷത വഹിക്കും. തുറവൂർ ഗ്രാമപഞ്ചായത്ത് പ്രസിഡന്റ് മോളി രാജേന്ദ്രൻ ജനപ്രതിനിധികൾ, ഉദ്യോഗസ്ഥർ തുടങ്ങിയവർ സംസാരിക്കും.

രണ്ടാം ഘട്ടത്തിൽ അരൂര്‍, എഴുപുന്ന, കോടംതുരുത്ത്, കുത്തിയതോട്, പട്ടണക്കാട്, കടക്കരപ്പളളി, തുറവൂര്‍, വയലാര്‍, പുളിങ്കുന്ന്, നീലംപേരൂര്‍, കാവാലം, ചമ്പക്കുളം, നെടുമുടി, വെളിയനാട്, രാമങ്കരി, മുട്ടാര്‍, എടത്വ, തലവടി, തകഴി എന്നീ ഗ്രാമപഞ്ചായത്തുകളിലാണ് മെഗാ ശുചീകരണം നടക്കുക.

വേമ്പനാട് കായലുമായി ബന്ധപ്പെട്ട് കിടക്കുന്ന ആലപ്പുഴ ജില്ലയിലെ 31 തദ്ദേശസ്വയംഭരണ സ്ഥാപനങ്ങളില്‍ ‘പ്ലാസ്റ്റിക് വിമുക്ത വേമ്പനാട്’ മെഗാ ക്യാമ്പയിന്‍ നടന്നുവരുകയാണ്. ഒന്നാം ഘട്ടമെന്ന നിലയില്‍ ആലപ്പുഴ, ചേര്‍ത്തല നഗരസഭകളിലും അരൂക്കുറ്റി, പാണാവള്ളി, പെരുമ്പളം, തൈക്കാട്ടുശ്ശേരി, ചേന്നംപള്ളിപ്പുറം, തണ്ണീര്‍മുക്കം, മുഹമ്മ, മണ്ണഞ്ചേരി, ആര്യാട്, കൈനകരി ഗ്രാമപഞ്ചായത്തുകളിലെ തെരഞ്ഞെടുത്ത കായല്‍ ഭാഗങ്ങളില്‍ നിന്നും പ്ലാസ്റ്റിക്ക് മാലിന്യം നീക്കം ചെയ്യുന്നതിനുളള ശുചീകരണയജ്ഞം സംഘടിപ്പിച്ചിരുന്നു.