കളക്ഷൻ കണക്കുകളെല്ലാം വ്യാജം; സ്കൈ ഫോഴ്സ് ടിക്കറ്റുകൾ നിർമാതാക്കൾ തന്നെ വാങ്ങിയതെന്ന് വെളിപ്പെടുത്തൽ

ബോളിവുഡ് താരം അക്ഷയ് കുമാർ നായകനായി എത്തിയ ചിത്രമാണ് സ്കൈ ഫോഴ്സ്. ചിത്രം മികച്ച കളക്ഷൻ നേടിയെന്നാണ് റിപ്പോർട്ടുകൾ സൂചിപ്പിച്ചിരുന്നത്. എന്നാൽ ഈ കണക്കുകളെല്ലാം ഇല്ലാത്തതാണെന്ന് പറയുകയാണ് ഇന്റസ്ട്രി കളക്ഷൻ ട്രാക്കറായ കോമൾ നഹ്ത. സ്കൈ ഫോഴ്സ് ആദ്യ ആഴ്ച നേടിയത് 40.50 കോടിയാണ്. എന്നാൽ അത് 80 കോടി രൂപയാണെന്ന് നിർമാതാക്കൾ പ്രചരിപ്പിച്ചു.

എന്നാൽ സിനിമ മികച്ച പ്രകടനം കാഴ്ചവയ്ക്കുന്നുവെന്ന് അറിയിക്കാൻ വിറ്റു പോകാത്ത ടിക്കറ്റുകൾ നിർമാതാക്കൾ തന്നെ വാങ്ങിയെന്നും കോമൾ നഹ്ത ആരോപിച്ചു. ബുക്ക് മൈ ഷോയിൽ സിനിമയ്ക്ക് നല്ല ബുക്കിങ്ങ് ആണെന്നും എന്നാൽ സിനിമ കാണാൻ പോകുമ്പോൾ തിയറ്ററുകളിലെ സീറ്റുകൾ കാലിയാണെന്നും കോമൾ നഹ്ത പറഞ്ഞതായി ദ ഇന്ത്യൻ എക്സ്പ്രസ് റിപ്പോർട്ട് ചെയ്യുന്നു.

ബോളിവുഡിന്റെ ചരിത്രത്തിൽ ഏറ്റവും വലിയ ബ്ലോക്ക് ബുക്കിം​ഗ് ആയിരുന്നു സ്കൈ ഫോഴ്സിന്റേതെന്നും ഇദ്ദേഹം പറയുന്നു. ഫിലിം ഇൻഫോർമേഷൻ.കോമിനോട് ആയിരുന്നു നഹ്തയുടെ പ്രതികരണം. ജനുവരി 24ന് റിലീസ് ചെയ്ത ചിത്രമാണ് സ്കൈ ഫോഴ്സ്. സന്ദീപ് കെവ്‌ലാനിയും അഭിഷേക് കപൂറും ചേർന്ന് സംവിധാനം ചെയ്ത ചിത്രം ഇതുവരെ 112.75 കോടി നേടിയെന്നാണ് ട്രേഡ് അനലിസ്റ്റുകൾ റിപ്പോർട്ട് ചെയ്യുന്നത്.