സ്പോര്‍ട്സ് സ്‌കൂള്‍ പ്രവേശനം; ട്രയല്‍സ് ഫെബ്രുവരി ഒന്നിന്

തിരുവനന്തപുരം : തിരുവനന്തപുരം വെള്ളായണിയിലെ അയ്യങ്കാളി മെമ്മോറിയല്‍ മോഡല്‍ റസിഡന്‍ഷ്യല്‍ സ്പോര്‍ട്സ് സ്‌കൂളിലേക്കുള്ള തിരഞ്ഞെടുപ്പ് ആരംഭിച്ചു. 5, 11 ക്ലാസുകളിലേക്കുള്ള മുഴുവന്‍ സീറ്റുകളിലേക്കും 6, 7, 8, 9 ക്ലാസുകളിലെ ഒഴിവുള്ള സീറ്റുകളിലേക്കുമായി പട്ടിക വിഭാഗത്തില്‍പ്പെട്ട കായിക താരങ്ങള്‍ക്കാണ് പ്രവേശനം നല്‍കുന്നത്. പാലക്കാട് ജില്ലയില്‍ നിന്നുള്ള വിദ്യാര്‍ഥികളെ തിരഞ്ഞെടുക്കുന്നതിനായുള്ള ട്രയല്‍സ് ഫെബ്രുവരി ഒന്നിന് രാവിലെ എട്ടു മണി മുതല്‍ വിക്ടോറിയ കോളേജില്‍ നടക്കും.

അത്ലറ്റിക്സ്, ജൂഡോ, റസ്ലിങ്, ജിംനാസ്റ്റിക്സ്, ഫുട്ബാള്‍ എന്നീ ഇനങ്ങളാണ് വെള്ളായണി സ്പോര്‍ട്സ് സ്‌കൂളില്‍ പരിശീലിപ്പിക്കുന്നത്. വിദ്യാര്‍ഥികളുടെ മുഴുവന്‍ ചെലവും സംസ്ഥാന സര്‍ക്കാര്‍ വഹിക്കും. കായിക മികവിനൊപ്പം അക്കാദമിക് രംഗത്തും മുന്നിട്ടുനില്‍ക്കുന്ന സ്‌കൂള്‍ ഈ വര്‍ഷത്തെ സംസ്ഥാന കായിക മേളയില്‍ ആദ്യ പത്തിലെത്തിയിരുന്നു. ദേശീയ – സംസ്ഥാന – ജില്ലാ തല വിജയികള്‍ക്ക് കായികക്ഷമതയുടെ അടിസ്ഥാനത്തില്‍ നേരിട്ടും പ്രവേശനം നല്‍കും. കൂടുതല്‍ വിവരങ്ങള്‍ക്ക് ജില്ലാ, ബ്ലോക്ക് പട്ടിക വിഭാഗം ഓഫീസുകളിലോ പട്ടികജാതി പട്ടികവര്‍ഗ്ഗ പ്രമോട്ടര്‍മാരെയോ ബന്ധപ്പെടണം. വെള്ളായണി എം.ആര്‍.എസ്. സ്‌കൂളില്‍ നിന്നും വിശദാംശങ്ങള്‍ അറിയാം. ഫോണ്‍ – 7356075313, 9744786578.