ഭാരതപ്പുഴയില്‍ കുളിക്കാൻ ഇറങ്ങി, നാലംഗ കുടുംബം ഒഴുക്കില്‍പ്പെട്ടു; അമ്മ മരിച്ചു, തെരച്ചില്‍ തുടരുന്നു

തൃശ്ശൂര്‍: ഭാരതപ്പുഴയില്‍ കുളിക്കാനിറങ്ങിയ നാലംഗ കുടുംബത്തിലെ ഒരാള്‍ മരിച്ചു. ചെറുതുരുത്തി സ്വദേശികളായ കബീര്‍, ഭാര്യ റെഹാന, മകളായ സെറ, കബീറിന്റെ സഹോദരിയുടെ മകന്‍ ഹയാന്‍ എന്നിവരാണ് അപകടത്തില്‍പെട്ടത്. റെയ്ഹാനയെ രക്ഷപ്പെടുത്തി ആശുപത്രിയിലെത്തിച്ചെങ്കിലും ജീവന്‍ രക്ഷിക്കാന്‍ സാധിച്ചില്ല.ഭാരതപ്പുഴ കാണാനാണ് കുടുംബം എത്തിയതെന്നാണു വിവരം.

കുട്ടികളില്‍ ഒരാള്‍ പുഴയില്‍ വീണതോടെ രക്ഷിക്കാനായി ബാക്കിയുള്ളവരും പുഴയിലേക്ക് ഇറങ്ങുകയായിരുന്നു. ഇതോടെ ഇവര്‍ ഒഴുക്കില്‍പ്പെടുകയും കബീറിനെയും മക്കളെയും കാണാതാവുകയുമായിരുന്നു.
പുഴയില്‍ ധാരാളം കുഴികള്‍ ഉണ്ടെന്നാണു നാട്ടുകാര്‍ പറയുന്നത്. പ്രത്യേക മുന്നറിയിപ്പ് ബോര്‍ഡുകള്‍ തീരത്ത് ഉണ്ടായിരുന്നില്ല. ഇവര്‍ വീണ ഭാഗത്ത് ആഴം കൂടുതലാണെന്നും ചെറിയ കുഴികള്‍ ധാരാളം ഉള്ളതായും പറയുന്നു. വടക്കാഞ്ചേരി, ഷൊര്‍ണൂര്‍ അഗ്‌നിരക്ഷാ സേനാംഗങ്ങള്‍ പുഴയില്‍ തിരച്ചില്‍ നടത്തുകയാണ്.