3600 പേരെ പിരിച്ചു വിടാനൊരുങ്ങി സക്കർബർഗ്

ജോലിയിൽ മോശം പ്രകടനം നടത്തുന്ന മെറ്റയിലെ ജീവനക്കാർ സൂക്ഷിക്കുക. നിങ്ങളെ സാക്ഷാൽ മാർക്ക് സക്കർബർഗ് നേരിട്ട് നിരീക്ഷിക്കുണ്ട്. പ്രകടനം പിന്നോട്ടായാൽ പിരിച്ചുവിടുമെന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. മെറ്റ സിഇഓ മാർക്ക് സക്കർബർഗിൻ്റെ ഇൻ്റേണൽ മെമ്മോ അനുസരിച്ച് ഉൽപ്പാദനക്ഷമത വർധിപ്പിക്കുന്നതിന് മോശം പ്രകടനം കാഴ്ചവെക്കുന്ന ജീവനക്കാരെ പിരിച്ചുവിടാനാണ് തീരുമാനം. ഏകദേശം 3600 ജീവനക്കാരെ പിരിച്ചു വിടാനാണ് സാധ്യത. വാട്ട്സ്ആപ്പ്, ഫെയ്‌സ്ബുക്ക്, ഇൻസ്റ്റഗ്രാം ഉൾപ്പെടെയുള്ള മെറ്റക്ക് കീഴിലുള്ള ആകെ ജീവനക്കാരുടെ അഞ്ച് ശതമാനത്തിനെയാണ് പിരിച്ചുവിടൽ ബാധിക്കുക.

പ്രകടനത്തെ അടിസ്ഥാനമാക്കിയുള്ള പിരിച്ചുവിടലുകൾ പ്രധാന യുഎസ് കോർപ്പറേഷനുകൾക്കിടയിൽ ഒരു സാധാരണ രീതിയാണ്. സമാനമായ രീതിയിൽ മൈക്രോസോഫ്റ്റും കഴിഞ്ഞയാഴ്ച പിരിച്ചുവിടലുകൾ പ്രഖ്യാപിച്ചിരുന്നു. ജനുവരി 20ന് ഡൊണൾഡ് ട്രംപ് പ്രസിഡന്റായി സ്ഥാനമേൽക്കുന്നതിന് മുന്നോടിയായി നടത്തുന്ന മെറ്റയിലെ വിശാലമായ മാറ്റങ്ങൾക്കിടയിലാണ് പിരിച്ചുവിടൽ. കമ്പനിയിലുള്ളത് മികച്ച ജീവനക്കാരാണെന്ന് ഉറപ്പുവരുത്തുന്നതിനാണ് ഇപ്പോൾ നടക്കുന്ന പിരിച്ചുവിടലെന്ന് മാർക്ക് സക്കർബർഗ് പറഞ്ഞു.