1999 രൂപ മാത്രം; ഗ്യാലക്സി എസ്25 അള്‍ട്ര വേണമെങ്കിൽ വേഗം ബുക്ക് ചെയ്തോളൂ

ഡൽഹി: വെറും 1999 രൂപ മുടക്കി സാംസങിന്‍റെ ഏറ്റവും പുതിയ ഫ്ലാഗ്ഷിപ്പ് സ്‌മാര്‍ട്ട്ഫോണ്‍ ലൈനപ്പായ ഗ്യാലക്സി എസ്25 ഇപ്പോള്‍ ഇന്ത്യയിലും പ്രീ-റിസര്‍വ് ചെയ്യാം. ഇന്ത്യയിലെ സ്റ്റോറുകള്‍ വഴിയാണ് ഫോണുകള്‍ മുന്‍കൂറായി ബുക്ക് ചെയ്യേണ്ടത്.

കാലിഫോര്‍ണിയയിലെ സാന്‍ ജോസില്‍ ജനുവരി 22-ാം തിയതി നടക്കുന്ന ‘ഗ്യാലക്സി അണ്‍പാക്ഡ് 2025’ ഇവന്‍റിലാണ് ഗ്യാലക്സി എസ്25 സിരീസ് സാംസങ് പുറത്തിറക്കുക. ഗ്യാലക്സി എസ്25, ഗ്യാലക്സി എസ്25+, ഗ്യാലക്സി എസ്25 അള്‍ട്ര എന്നീ മൂന്ന് സ്മാര്‍ട്ട്‌ഫോണ്‍ മോഡലുകളാണ് ഈ സിരീസിലുണ്ടാവുക എന്ന് ഉറപ്പായിട്ടുണ്ട്. ഗ്യാലക്സി എസ്25 സ്ലിം എന്നൊരു മോഡല്‍ കൂടി വരാന്‍ സാധ്യതയുണ്ട് എന്ന് അഭ്യൂഹങ്ങളുണ്ടെങ്കിലും സ്ഥിരീകരണമില്ല. ഗ്യാലക്സി എസ്25 സിരീസിലെ ഫോണുകള്‍ ഇന്ത്യയില്‍ ഇപ്പോള്‍ പ്രീ-റിസര്‍വേഷന് ലഭ്യമാണ്. റീഫണ്ടബിളായ 1999 രൂപ മുടക്കിയാല്‍ ഗ്യാലക്സി എസ്25 സിരീസ് ഫോണുകള്‍ ബുക്ക് ചെയ്യാം. ജനുവരി 22ന് ശേഷം ഫോണ്‍ വാങ്ങി പര്‍ച്ചേസ് പൂര്‍ത്തിയാക്കാം.

രണ്ടായിരം രൂപ മുടക്കി ഫോണ്‍ മുന്‍കൂട്ടി ബുക്ക് ചെയ്‌താല്‍ 5000 രൂപ മൂല്യമുള്ള ആനുകൂല്യങ്ങളും ലഭിക്കും. ഗ്യാലക്സി എസ്25 സിരീസിലെ സ്മാര്‍ട്ട്‌ഫോണുകളുടെ ഫീച്ചറുകള്‍ എന്തൊക്കെയെന്ന പൂര്‍ണ വിവരം പുറത്തുവന്നിട്ടില്ല. അതിനാല്‍ ഫോണുകള്‍ ഇഷ്ടപ്പെട്ടില്ലെങ്കില്‍ ടോക്കണ്‍ തുകയായ 1999 രൂപ തിരികെ വാങ്ങാന്‍ പ്രീ-റിസര്‍വ് ചെയ്തവര്‍ക്ക് കഴിയും.