തൃശൂരിൽ അമിത വേ​ഗതയിലെത്തിയ ബസ് പെട്ടി ഓട്ടോറിക്ഷയിലിടിച്ചു; ഡ്രൈവർക്ക് ​ഗുരുതര പരിക്ക്

തൃശൂർ: തൃശൂരിൽ അമിത വേ​ഗതയിലെത്തിയ ബസ് പെട്ടി ഓട്ടോറിക്ഷയിലിടിച്ച് അപകടം. റിക്ഷ ഡ്രൈവർക്ക് പരിക്ക്. കാഞാണി പെരുമ്പുഴ പാടത്ത് ഒന്നാം പാലത്തിൽ വെച്ചാണ് അമിതവേ​ഗതയിലെത്തിയ ബസ് ഇടിച്ചത്. പെട്ടി ഓട്ടോറിക്ഷ ഡ്രൈവർ വെളുത്തൂർ സ്വദേശി മാരാൻ വീട്ടിൽ ഉണ്ണികൃഷ്ണനാണ് ഗുരുതരമായി പരിക്കേറ്റത്.

മീൻ കച്ചവടക്കാരനായ ഉണ്ണികൃഷ്ണൻ പെട്ടി ഓട്ടോറിക്ഷയിൽ മീനെടുക്കാനായി ചേറ്റുവയിലേക്ക് പോകുന്ന വഴിയാണ് അപകടം സംഭവിച്ചത്. പെരിഞ്ഞനത്ത് നിന്നു തൃശ്ശൂർക്ക് വന്നിരുന്ന കമൽരാജ് ബസ് നിയന്ത്രണം വിട്ട് ഉണ്ണിക്കൃഷ്ണന്‍റെ വാഹനത്തിൽ ഇടിക്കുകയിയിരുന്നു. ബസ് അമിത വേഗതയിലായിരുന്നുവെന്ന് ദൃക്സാക്ഷികൾ പറഞ്ഞു. പാലത്തിൽ വെച്ച് മറ്റൊരു വാഹനത്തെ മറി കടക്കാൻ ശ്രമിക്കുമ്പോഴാണ് അപകടമുണ്ടായത്.