സിനിമയുടെ ലൊക്കേഷൻ പരിശോധിക്കാൻ എത്തി; ദിലീപ് ചിത്രത്തിൻ്റെ ആർട്ട് ഡയറക്ടർ ചതുപ്പിൽ കുടുങ്ങി

കൊച്ചി: സിനിമ ചിത്രീകരണത്തിനുള്ള ലൊക്കേഷൻ പരിശോധിക്കാൻ എത്തിയ ആർട്ട് ഡയറക്ടർ ചതുപ്പിൽ കുടുങ്ങി. നടൻ ദിലീപ് നായകനാകുന്ന ഭ ഭ ബ (ഭയം ഭക്തി ബഹുമാനം) എന്ന ചിത്രത്തിന്റെ ആർട്ട് ഡയറക്ടരായ നിമേഷിനാണ് അപകടം സംഭവിച്ചത്. വൈപ്പിൻ എൽഎൻജി ടെർമിനലിന് മുന്നിലുള്ള പൈലിംഗ് ചെളി നിറഞ്ഞ ചതുപ്പിലാണ് താഴ്ന്നത്. ചിത്രീകരണത്തിന് വേണ്ടി ലൊക്കേഷൻ പരിശോധിക്കാൻ എത്തിയതായിരുന്നു നിമേഷ്. നടന്നു നീങ്ങിയപ്പോൾ ചതുപ്പിൽ കാൽ താഴ്ന്നു പോവുകയായിരുന്നു. ഉടൻ തന്നെ ഫയർ ഫോഴ്‌സിൽ വിവരം അറിയിച്ചു. ഫയർ ഫോഴ്സ് ഉദ്യോഗസ്ഥരെത്തി ഇയാളെ രക്ഷപെടുത്തി. പ്രദേശത്ത് ചതുപ്പ് ഉണ്ടെന്നു സൂചിപ്പിക്കുന്ന മുന്നറിയിപ്പ് ബോർഡുകൾ ഒന്നും ഇല്ലാത്തതാണ് അപകട കാരണമെന്ന് സമീപ വാസികൾ പറഞ്ഞു.